Ábrese un espediente que denuncia 94 viviendes illegales en Celoriu

L’Asociación de Vecinos de Celoriu “La Hoguera” vien de comunicar que’l Defensor del Pueblu yá abrió un espediente sobre 94 viviendes illegales construyíes en Celoriu. Denuncien amás qu’entá nun hai vivienda protexida na llocalidá llanisca.

A petición de l’Asociación de Vecinos de Celoriu “La Hoguera”, el Defensor del Pueblu d’España yá abrió l’espediente necesariu pa denunciar 94 viviendes ilegales existentes anguaño en Celoriu. Estes construcciones, con valor de 21 millones d’euros y que tán axudicaes a 11 promotores, cuenten con llicencies favorables pero illegales, por mor d’infracciones administratives urbanístiques.

L’asociación vecinal espone amás que’l Equipu de Gobiernu llaniscu nun quixo colaborar col Defensor del Pueblu y qu’agora esti últimu organismu va tener que realizar una quexa nel Parlamentu Español incluyendo al Ayuntamientu de Llanes nel so informe de xestión anual a les Cortes Xenerales.

“Demostrámoslo técnica y xurídicamente y agora nun quieren contestar porque nun tienen argumentos pa xustificar les infracciones cometides y permitides a estes 11 promotores”, critiquen dende “La Hoguera” sobre la postura del Gobiernu llaniscu.

Viviendes protexíes
“En tos estos años d’escesos urbanísticos, Celoriu nun consiguió qu’exista nin un solu centímetru de propiedá pública”, denuncia l’asociación vecinal. A la par, insten a los responsables d’Urbanismu de Llanes de dar un “xiru de 180º” a la so política pa que construya vivienda protexida y llegal.