Empate d’un Sporting que mereció más en San Mamés

L’Sporting de Xixón algamó un empate a cero goles na so visita al Athletic de Bilbao nel partíu d’ida de los cuartos de final de la Copa del Rei. Los asturianos dominaron el xuegu frente a los locales, qu’amás fallaron un regalu del árbitru en forma de penalti.

La meyor cara del Sporting volvió apaecer, esta vez na “Catedral” y na ida de los cuartos de final de la Copa del Rei. Los asturianos salieron presionando, dominando’l centru’l campu y seguros en defensa frente a un Athletic  mui fallón nos pases y con poca pegada n’ataque. Sicasí, los vascos tuvieren la so oportunidá nun regalu del árbirtu nel minutu 24, cuando señaló un penalti de Neru sobre Llorente que namas vio él. El delanteru llanzó’l balón fuera y a partir d’esi momentu’l dominiu del Sporting foi indiscutible. Lora, Barral y Omar llevaron el peligru a la portería local, anque faltare precisión nos metros finales.

La segunda parte foi una continuación de la primera, anque los locales dominaron más el balón, mientres l’Sporting intentaba sorprender al contraataque. Nin unos nin otros fueron quien a marcar, pero mientres los bilbaínos malpenes llevaron peligru a la portería asturiana, los xixoneses buscaron el gol, anque lo mesmo que na primer parte, nun fueren lo suficientemente contundentes nel últimu tiru.

En definitiva un empate que dexa la eliminatoria abierta dafechu a la espera del partíu de vuelta la selmana qu’entra n’El Molinón.

Ficha Técnica

Athletic Club: Iraizoz; Iraola, Ocio, Amorebieta, Koikili; Susaeta (Etxeberria, min.58), Orbaiz, Javi Martínez (Gurpegui, min.76), Gabilondo (David López, min.46); Ion Vélez y Llorente.

Sporting de Xixón: Sergio Sánchez; Sastre, Neru, Iván Hernández, José Angel; Diego Camacho, Michel; Omar (Pedro, min.77), Lora (Kike Mateo, min.69), Diego Castro (Raúl Cámara, min.86); y Barral.

Árbitru: Medina Cantalejo (Colexu andaluz). Sacó tarxetes amarielles a Omar, Neru, Lora y Barral, toos ellos del Sporting.