David Artime: "Los grupos ultras representen l’espíritu más popular del fútbol"

David Artime (Candás, 1979) ye periodista y escritor. Tres ganar dellos premios lliterarios, estrénase na novela llarga con ‘La bufanda’, obra pionera que trata sobre’l movimientu ultra nel fútbol y que-y dio’l premiu de narraciones Trabe 2009.

 
Estrénase na novela llarga asturiana con una obra sobre’l movimientu hoolingan ¿Por qué escoyó esta temática?
Apasionóme dende guah.e. Dende rapacín diba ver al Sporting con mio pá y pasaba más tiempu mirando pa les grades que pal campu; ye un fenómenu que siempre me llamó muncho l’atención.

Tamién siempre me interesaron les obres de ficción sobre esta temática. La cuestión ye que n’España namás qu’hai un llibru de David Gistau que la trata como telón de fondu. Cuando quies lleer o ver dalgo de ficción sobre esti tema tienes que dir a Inglaterra, Italia o Arxentina. Entós paecióme un bon puntu d’arranque facelo, y facelo n’asturianu.

¿Hacia qué públicu va orientada ‘La bufanda’? ¿Ye una novela que puede prestar tamién a los non fútboleros?
Si me lo preguntes enantes d’entamar a escribir diríate “a un públicu d’ente 15 y 30 años, fútboleru y sobremanera sportinguista”. El casu ye que’l llibru empezó a vendese y notes que ta gustando a munchísima xente, hasta a los que nun-yos interesaba’l fútbol o a persones mayores y de mediana edá. Tamién ta faciendo qu’haiga persones que tea garrando interés hacia’l mundu de la grada, cosa que a mi paecíame imposible. Así que pienso que ye adaptable a cualquier tipu de públicu.

Al ser una temática virxen na lliteratura asturiana ¿Cree que pue facer que s’avere xente nuevo a lleer n’asturianu?
Sí, claro. Esa foi una de les baces coles que xugué. Nun hai nada escrito sobre esti tema y sí qu’hai una demanda, de xente sobre too que va al fútbol. Entós si a esa xente-y entres con un llibru n’asturianu probablemente munchos d’ellos, anque non toos, van garralu, van lleélu n’asturianu y van dase cuenta de qu’esta llingua sirve lo mesmo que’l castellanu pa falar de too y que nun-yos va sonar a chinu. Paezme que pue servir muncho pa la normalización.

Nesti sen defendes que’l modelu llingüísticu qu’uses ye correctu, pero cenciellu ¿Por qué esta elección?
Porque toi fartu de lleer trabayos n’asturianu qu’usen una llingua escesivamente rebuscada y qu’en munchos casos dificulta la comprensión. Son obres que tán feches pa xente mui lletrada n’asturianu. Entós cuando se fala de normalización yo me dirixo a la xente que nun ta avezada a lleer n’asturianu y lo que quiero ye que m’entiendan.

Yo, respetando la norma, apuesto por ciertu nivel de castellanización; nel sentíu de facelu dixerible al públicu mediu qu’anguaño ta alloñáu del asturianu y que debería tar cercanu a él. Nun se si ye la correcta, pero paezme que ye una decisión que tendríen qu’escoyer munchos escritores n’Asturies.

Volviendo al tema de ‘La bufanda’ ¿Cuála ye la so esperiencia nos grupos hoolingans?
Directamente colos grupos nenguna, lo que pasa que yo viaxé muncho col Sporting. Entós ves munches coses que t’ayuden pa inspirate pa escribir. A mí tocóme ver enfrentamientos, correr de la policía, d’otros grupos, sentir tensiones… y too esto val pa escribir.  Per otru llau, llevo munchos años lleendo sobre esti tema en llibros, n’Internet, faciendo, por gustu, ciertu llabor de documentación que me valió pa la novela.

Criticabes na presentación del llibru el tratu que se-y da al tema de los ultres dende los medios de comunicación ¿Qué más pues añedir sobre esto?
Ye un tema que me lleva quemando muncho tiempo. Por mor de los diferentes acontecimientos violentos nel fútbol, los medios de comunicación lláncense al sensacionalismu descomanáu. Coles situaciones d’ultres sí que se xenera peligru y inseguridá, pero polo xeneral siempre ye más pequeñu de lo que se reflexa nos medios.

El nivel de violencia nel fútbol nel Estáu español ye muncho menor al que pue haber n’Italia o n’Arxentina; esto quier decir que nos medios de comunicación utilicen munches veces el movimientu ultra pa xenerar sensacionalismu y construir una imaxen mui típica-tópica del ultra peligrosu, delincuente, asesín que solo sabe armar xaréu. Yo nun digo que nun tengan carácter violentu, porque si lu tienen; nin que nun sean un problema, porque sí lo son; pero tienen otres munches coses como son la identificación colos colores, la pasión o’l compañerismu. Esta ye una realidá cola que se debería contar, sobre too a la hora de tratala dende un puntu de vista informativu.

Centra la historia de la novela nun grupu ultra sportinguista imaxinariu, pero ¿Qué opinión tien pa colos Ultra Boys? Esti grupu sportinguista ta catalogáu d’ultraderechista y acusáu d’agresiones xenófobes y idelóxiques…
Considero que los Ultra Boys a nivel de grupu, d’animación y de capacidá d’organización son de los meyores del Estáu español. Pero a nivel políticu, dende’l mi puntu de vista, tán bastante lloñe de ser apolíticos, anque se definan como ello. Por mor de munches actitudes que tuvieron nos años 90 y por relaciones con otros grupos ultres, tovía tienen un altu nivel de politización. Dientro d’Ultra Boys, pesie a que puea haber una mayoría de xente que namás s’interese pol Sporting, hai un sector que tien una actitú política reaccionaria y d’estrema derecha.

A mí evidentemente, basándome na mio ideoloxía y la mio forma de ver la vida, ye dalgo que me disgusta; pero hai que tener en cuenta y asumir la realidá de que n’España’l fútbol ta mui politizáu. Hai poquísimos grupos apolíticos, hai unos pocos d’izquierda o estrema izquierda, y la mayoría son de dereches dafechu. Ye una pena, pero hai que convivir con ello.

Y sobre la violencia ¿Cómo s’enfoca’l tema en ‘La bufanda?
Un hooligan ve la violencia dende un puntu de vista románticu, hai una visión diferente, que ye la que yo trato de reflexar na mio novela. Lo que pa otres persones ye una panda quinquis armando xaréu pela cai, pa un ultra ye una batalla épica, dalgo digno de ver, anque lleve a una problemática social importante. Yo non xustifico esto, pero ye una realidá qu’hai que reflexar.
 
Na novela tamién critiques otros aspectos como’l fútbol modernu…
Parto de la base de que’l fútbol yera muncho más guapo nos años 80. Anque siempre foi un negociu, agora convirtióse nun deporte clasista, elitista, corrompíu del too polos intereses económicos y mediáticos. Nun se prima la cantera ni la animación, namás que se quieren estadios onde too’l mundu tea sentáu, que nun s’arme xaréu y que cada persona pague 100 euros pola entrada pa que s’enriquezan cuatro. Ye una idea antagónica a la que yera’l fútbol nos años 80, que yera un deporte baratu, de la clase trabayadora.

D’esti mou, yo entiendo que los grupos ultras representen l’espíritu más popular y apasionáu del fútbol. Ye una forma de vivirlo estremada al ideal del fútbol d’anguaño, por eso ellos dicen, y yo recueyo na mio novela, “odio eterno al fútbol moderno”, una defensa de lo que yera’l fútbol nos años 70 y 80 como dalgo popular. Too esto ta rompiéndose: fichaxes millonarios, cámares nos estadios, toles llocalidaes son d’asientos… a mi paezme dalgo vergoñoso.

Premiu de narraciones Trabe 2009, per dos vegaes premiu de relatu eróticu del Conceyu Ribeseya… Paez que-y va bien nesto d’escribir ¿Tien más proyectos en mente? ¿Qu’opina de les nueves xeneraciones de la lliteratura asturiana?
Prestaríame seguir escribiendo sobre esta temática, anque lo próximo que vaya facer nun va ser sobre esto; pero sí que va ser un tema tamién mui de la cai, mui xuvenil, reflexando problemátiques xuveniles y sociales que m’atraen y que creo que son recurrentes dende’l puntu de vista lliterariu.

Nesti sen, creo que la lliteratura asturiana ta dando un xiru. Tán saliendo noveles que tán atreviéndose con temes más modernos y urbanos y me paez que ye dalgo mui positivu. Pienso que la nuesa lliteratura pecó hasta ciertu puntu d’un escesivu costumismu, carga política y de señaldá: los emigrantes, los maquis, la posguerra… coses d’esti tipu que tán mui bien, pero me paez qu’hai una sobrecarga. Faltaba un poco de temática más de la cai y creo que tán saliendo bastante coses asina, lo que me paez mui positivo y espero que se siga trabayando nesti sentíu.