Pintar-Pintar entamará a editar tamién en catalán

La editorial asturiana Pintar-Pintar cuenta entamar a editar llibros en catalán a partir d'esti mesmu añu. Concretamente los llibros escoyíos son dos álbunes ilustraos que s'espublizaren primeramente n'asturianu: "El poema que cayó a la mar" d'Aurelio González Ovies y "¿De qué tará fecha la lluna?" de Miguel Rojo, dambos na torna de Sabela Quintanilla Nisal.

Esther Sánchez, responsable de la editorial, asegura qu'estos dos llibros van valir de prueba pa ver como respuende'l mercáu editorial catalán a la recepción de llibros asturianos tornaos a la so llingua. Al empar tamién manifiesta que, de salir bien esti proyectu, tán dimpuestes a ampliar la esperiencia a otres llingües del estáu como'l gallegu.
"El poema que cayó a la mar" y "¿De qué tará fecha la lluna?" fueron dos de los primeros álbunes editaos por Pintar-Pintar, dambos nel añu 2008. Tanto Miguel Rojo como Aurelio González Ovies tienen espublizaos otros llibros cola editorial asturiana, ente ellos rescamplen "Chispina" de González Ovies y "El viaxe de Tin y Ton" de Rojo, ganador amás del Premiu de la Crítica d'Asturies na so edición en castellán.