El Bloque entruga na Xunta Xeneral sobre la Gala del Día d’Asturies

El Bloque por Asturies preguntó güei nel parlamentu asturianu si la realización de la Gala del Día d’Asturies, que va emitir la TPA el 8 setiembre, se-y concedió al grupu empresarial de José Luis Moreno al traviés de concursu públicu.

Asina lo trasmitieron esti vienres en rueda de prensa’l portavoz del Grupu Parlamentariu del Bloque por Asturies, Roberto Colunga, y el portavoz nacional del BA, Rafael Palacios.

Del mesmu mou, pidieron información al rodiu los contratos firmaos ente’l Gobiernu asturianu, l’ente públicu de comunicación o otres empreses públiques; y el Grupu José Luis Moreno, ‘Kulteperalia’ o ‘Miramón Mendi’ La rempuesta parlamentaria va obtenese nun plazu d’alredor de 15 díes.

Según indicó Palacios, tamién el costu del espectáculu ye “preocupante”. Peor tovía, continuó, nun contestu de crisis nel que’l Gobiernu aplica axustes a determinaos sectores mientres “tira perres de los ciudadanos en supuestes figures de la canción”. Nesi sen, opinó que’l Principáu ta “esperdiciando” la creatividá de los músicos del país.

Pal BA ye “gravísimu” que la propia directora de la producción del grupu de Moreno, Natalia Rodríguez, almitiera que la empresa llevaba “trabayando abondo tiempu na organización de los actos del Día d’Asturies”. Tamién criticaron que’l empresariu celebrase una reunión privada, el pasáu 17 de febreru, col presidente del Conseyu de Gobiernu na sede de la Presidencia, según el Bloque, pa falar de la Gala y organizar espectáculos en Laboral Ciudá de la Cultura.

Esti comportamientu diría acordies a la “complicidá del silenciu” que se vive n’Asturies, y que se caracteriza por facer “alcuerdos a espaldes de la sociedá asturiana”, sentenció Palacios.

José Luis Moreno y Isabel Pantoja
Rafael Palacios recordó tamién qu’a José Luis Moreno lu acusaron de sobornar al ex-presidente balear, Jaime Matas, pa que les gales televisives se-y concedieren a la so empresa. Amás, criticó qu’Isabel Pantoja actúe per dos vegaes n’Asturies en menos d’un mes, el 21 d’agostu en La Laboral de Xixón y el 8 setiembre en Ribeseya.