CC.OO d'Asturies alerta de que la perda de población y el so avieyamientu ye'l problema más grave p'Asturies

|

CC.OO alertó güei de que la perda de población y el so avieyamientu suponen el problema social, llaboral, económicu y políticu "más seriu" al que va tener qu'enfrentase Asturies nos próximos años.
 
N'opinión del sindicatu, les causes del avieyamientu de la población asturiana se deben al débil crecimientu económicu, al accesu tardíu o inestable al emplegu, a lo caro de la vivienda y a les dificultaes pa compaxinar vida llaboral y familiar, y a la escaez d'apoyos a la maternidá.
 
Según informó'l sindicatu nuna nota prensa, los datos que facilitó ayeri l'Institutu Nacional d'Estadística (INE) espeyen qu'Asturies va vivir "una auténtica sangría poblacional nos próximos años y confirmen que l'avieyamientu y la perda de población suponen güei'l problema social, llaboral, económicu y políticu más seriu al que va tener qu'enfrentase la rexón nos próximos años, tal como vien denunciando CC.OO dende hai tiempu".
 
El secretariu d'Emplegu de CC.OO d'Asturies, Miguel Iglesias Ballina, afirmó que "la estructura demográfica de la rexón, caracterizada pola perda de población y por un altu grau d'avieyamientu de la mesma, esplica la situación d'Asturies en cuanto a los sos niveles d'actividá y emplegu y condiciona "seriamente les posibilidaes de relevu xeneracional nel mercáu llaboral".
 
Miguel Iglesias Ballina alertó de que "les consecuencies d'esta situación van ser dramátiques, sobre los sistemes educativu, sanitariu y de pensiones, el mercáu llaboral y l'actividá productiva, y los servicios sociales, si nun somos quién a correxila con actuaciones coordinaes y d'envergadura a les que ye necesario dar prioridá".
 
Pal secretariu d'Emplegu de CC.OO d'Asturies, les reducíes tases de natalidá na rexón y l'éxodu de la población moza s'espliquen polos mesmos motivos que l'aviyamientu.
 
Miguel Iglesias Ballina cree que "pa incrementar les tases de natalidá y recuperar población ye preciso puxar por polítiques que favorezan la creación de más emplegu y de calidá, l'accesu a la vivienda y el cambiu d'una cultura empresarial, hasta agora poco favorable a la maternidá y facilitar la compaxinación de la vida llaboral y familiar".
 
También son necesaries polítiques públiques que contribuyan a esta compaxinación y que favorezan la maternidá. Pal secretariu d'Emplegu de CC.OO d'Asturies, "anque l'Aceba contempla midíes importantes qu'avancen nesa direición, ye necesario un mayor esfuerzu pa calcar de manera determinante nesti grave problema".

Contador Estadistiques