Andecha Astur fai alcordanza del Conseyu d’Asturies y Lleón

Andecha Astur va celebrar esti día 28 un actu n’alcordanza de la soberanía del Conseyu d’Asturies y Lleón. Los nacionalistes tamién se posicionaron sobre’l 8 setiembre al calificar de “perpositiva” la convocatoria de Democracia p’Asturies.

El Puertu Tarna ye’l llugar nel qu’Andecha Astur va conmemorar el 73 cabudañu de la declaración de soberanía del Conseyu d’Asturies y Lleón. Esti actu fízose dellos años en Xixón, onde s’asitiaba la sede del gobiernu soberanu, pero los organizadores consideren que Tarna ye “otru llugar simbólicu, nesti casu pola resistencia contra’l facismu”.

Con una llínia d’autocar que va pasar per Xixón, Noreña y Llangréu, a partir de les diez y media la mañana del sábadu 28 va entamar un percorríu peles llínies defensives p’acabar cola ascensión al picu Abedular. L’actu va dar fin a les 14 hores cola intervención política de voceros d’Andecha y Darréu y una espicha popular.

Sofitu a Democracia p’Asturies
Andecha Astur tamién ta acabantes de valorar positivamente la convocatoria de manifestación planteada por Democracia p’Asturies con vistes al 8 setiembre. Califiquen la propuesta de “ser oportuna nel tiempu”, de tener una “carga política innegable” y d’abrir “una puerta interesante pal aniciu d’un espaciu de trabayu xunitariu nel ámbitu de la reivindicación soberanista”.

A la par, la organización nacionalista declaró tener “voluntá pa participar en cualaquier otra convocatoria xunitaria que pudiera dase nesti díi”, llamando al “entendimientu”, “esfuerciu” y “xenerosidá” ente les formaciones sociales y polítiques asturianes.