El recorte n’obres públiques baxa a 5.700 millones d'euros

El ministru de Fomentu, José Blanco, avanzó güei que’l reaxuste sobre’l recorte de la inversión n’obres públiques medrará 200 millones d’euros pa salvar 49 infraestructures. N’Asturies va recuperase’l tramu de l’A-8 ente Asturies y Lugo.

 
Na so comparecencia de güei énte la Comisión de Fomentu del Congresu de los Diputaos, José Blanco señaló que’l recorte n’obra pública va reaxustase en 200 millones d’euros. D’esti mou, esti nuevu axuste eleva a 700 millones la inversión, en cuenta de los 500 millones d’euros anunciaos la selmana pasada.

Según esplicó’l ministru de Fomentu, la inversión recuperada va destinase a 49 infraestructures de too’l estáu y los 200 millones d’euros adicionales van finaciase con menor gastu nel Ministeriu de Fomentu. Sicasí, el recorte total ye bultable, yá que col plan d’austeridá son 5.700 millones d’euros menos los empobinaos a obres públiques.

Asturies va beneficiase del reaxuste cola recuperación de la obra de l’Autovía del Cantábricu A-8 nel so tramu d’Asturies y Lugo. No cincante al recorríu Llanes-Unquera, el ministru nun dio novedaes. Otres ocho comunidaes autónomes van beneficiase d’esta decisión de Fomentu.

Asturies fuera del plan d’inversión público-privada
José Blanco tamién anunció la llicitación de les ocho primeres obres que tarán nel Plan Estraordinariu d'Infraestrutures (PEI) de financiación público-privada. Esti nuevu plan, que movilizará una inversión de 17.000 millones nos dos años vinientes pa volver llanzar l'actividá económica y xenerar trabayu, nun afecta a Asturies pel momentu.