Israel pon duldes sobre un alcuerdu con Palestina nel plazu d'un añu

|

Israelíes y palestinos nun tienen prácticamente nenguna oportunidá d'algamar un alcuerdu de paz nel tiempu d'un añu fixáu por Estaos Xuníos, según afirmó esti miércoles el ministru israelí d'Asuntos Esteriores, Avigdor Lieberman.

"Nun hai una receta máxica (...) que nos puea llevar a que dientro d'un añu tengamos un alcuerdu permanente que dea llugar a lo cabero del conflictu y a la solución de toles cuestiones complicaes, como les de los refuxaos, Xerusalén y los allugamientos xudíos", indicó. "Creo que se deben baxar les espectatives y faceles más realistes", señaló a Israel Radio.

La secretaria d'Estáu norteamericana, Hillary Clinton, indicó la selmana pasada, al invitar a israelíes y palestinos a tornar a les conversaciones directes, que creía que toles cuestiones d'importancia pue que se resuelvan nun añu. Espérase que les conversaciones entamen el día 2 de setiembre.

Pero les negociaciones pue que sufran ciertu revés el viniente 26 de setiembre, cuando termine la moratoria de diez meses de la construcción d'allugamientos xudíos en Cisxordania.

El presidente de l'Autoridá Palestina (AP), Mahmud Abbas, amenazó con retirase d'estes conversaciones si Israel entá sigue cola construcción d'allugamientos.

Lieberman espresó la so confianza en que'l Conseyu de Ministros israelí nun espurra dicha moratoria --alcordada pol primer ministru israelí, Benjamin Netanyahu, baxo presión estaunidense y asina convencer a los palestinos d'entamar les conversaciones-- y señaló que los proyectos pa dellos miles de nueves viviendes podrían entamar rápidamente.

Mientres, Estaos Xuníos pidió a les dos partes que nun tomen medies que puedan torgar les negociaciones y aseguró que la cuestión de los allugamientos podría tratase nes conversaciones.

Lieberman, reconociendo una moratoria 'de facto' en Xerusalén Este que nun taba incluida na xelación formal, indicó que 1.600 viviendes pa israelíes "Pasaron tolos procesos de aprobación". Amás, añadió que la construcción podría entamar darreu pa otres 2.000 viviendes en Cisxordania na más que termine la moratoria.

 

Contador Estadistiques