UNA afirma que'l 'Zara de la cultura' amuesa’l fracasu de Llaboral

La vocera d’UNA en Xixón, Yolanda González califica de debaláu'l “xiru de 180º col que de tentar de competir con Nueva York pasa a facer competencia al Xovellanos o a Uviéu”.

Pa González la presencia d'Isabel Pantoja la nueche del sábadu y l'anuncia de José Luis Moreno de convertir La Llaboral na “Zara de la Cultura”, ye la constatación más evidente del fracasu dafechu del proyectu Llaboral, Ciudá de la Cultura, “l'apuesta estrella del gobiernu asturianu pa esta llexislatura”.

“L'anuncia de les intenciones de José Luis Moreno pa La Llaboral, y les declaraciones de Jorge Fernández León esta mesma selmana afirmando que'l proyectu nun cambia no sustancial, exemplifiquen la nefasta y xestión al debalu de los fondos públicos per parte del PSOE ya IU y una falta de respetu a los asturiano”, afirmó.

Según la portavoz d'UNA en Xixón “la política cultural d'esti gobiernu, amás de tar mui lloñe de la realidá asturiana, y tar fecha a base de discurrimientos faraónicos y delirios de grandeza, nun tien base nenguna na realidá social de Xixón y d'Asturies”.

Dende'l puntu de vista d'UNA en Xixón “depués de marafundiar millones d'euros por una mala planificación, piésllase'l proyectu inicial ensin asumir nenguna clas de responsabilidá, y dase un xiru de 180 graos reconvirtiendo'l proyectu inicial no contrario de lo que supuestamente yera; asina Xixón pasa de ser la vanguardia de la vanguardia y de promover un proyectu pa minoríes a implantar un fast-food de productos prefabricaos pa supuestu consumu de mases”.

Según Yolanda González, lo único que se caltién ye la falta de compromisu cola cultura y l'arte de Xixón y Asturies. La portavoz d'UNA rellacionó esti fracasu col de Llaboral Centru d'Arte “otru despropósitu que s'inxerta dientro del mesmu proyectu cultural y qu'UNA denunció dende la dimisión d'Eric Berger”, cuando criticó la pésima xestión del proyectu cultural que “torgaba'l construir un centru qu'atendiere a les necesidaes tanto del arte asturianu contemporáneo y del arte contemporáneo n'Asturies”.

Pa UNA, el Zara de la cultura que proponen Moreno, Areces y Fernández León ye resultancia de la incapacidá d'atrayer l'anovamientu a Asturies en tolos campos, “y nesti casu nel terrén de la cultura”.

“La idea de cultura de la que remanez esti despropósitu, nun ta diseñada y pensada pa les y los que vivimos equí, porque nun tien en cuenta les característiques sociales y culturales de la sociedá a la que ta destinada, como podemos ver tamién en tolos actos previstos pal próximu 8 de setiembre”, afirmó González.

Pa finar indicó que “si per una vegada'l gobiernu de PSOE ya IU escucharen les crítiques nel so momentu, pudimos aforrar esti nuevu ridículu y con ello convertir Xixón nun verdaderu referente nun ámbitu que nun seya'l desaniciu y marafundiu de fondos públicos, nos que tamos ensin dulda a la vanguardia d'Europa, y evitaríemos la vergoña que produz nos ámbitos de la cultura'l pasar de tentar de competir con Nueva York, Londres o Berlín a facer competencia a Uviéu, o al propiu Teatru Xovellanos, qu'ensin dulda ta meyor acuriosáu pa dalgunos d'estos espectáculos que'l propiu recintu de la Llaboral.