Los foriatos afiliaos a la Seguridá Social n'Asturies asítianse en 16.495

L'afiliación media de foriatos paró nel mes de xunetu al sumar sólo 497 cotizantes a la Seguridá Social. N'Asturies pertenecen a esti colectivu 16.495 persones.

Nesti sen, l'afiliación media de trabayadores estranxeros asitióse al finar el mes de xunetu en 1.900.157 ocupaos, lo que supón una xubida del 0,02 por cientu en comparación colos 1.899.660 ocupaos estranxeros rexistraos en xunetu.

Esti ruin estancamientu contrasta coles xubies de l'afiliación d'estranxeros rexistraos nos primeros meses del añu, cuando'l sistema llegó a sumar 33.169 cotizantes foriatos (mes de mayu).
  
Del conxuntu d'estranxeros que taben afiliaos a la Seguridá Social al finar xunetu, 1.282.766 cotizaben al Réximen Xeneral, 228.195 al Agrariu, 200.489 al d'Autónomos, 182.574 al del Llar, 5.463 al del Mar y 670 al del Carbón.
  
Dientro los países non comunitarios, 225.036 yeren de nacionalidá marroquí y 177.340 de nacionalidá ecuatoriana. Colombia, con 118.471 trabayadores, asítiase como tercer país de procedencia d'afiliaos, per delantre de China, que cuenta con 81.764 cotizantes.
  
El restu d'afiliaos non comunitarios repartiéronse ente Bolivia (80.952), Perú (72.708), Argentina (48.909), Ucrania (34.629), República Dominicana (33.866) y Brasil (26.261), ente otros.
  
Nesti sen, de los que son de la XE-27, rumanos, italianos y búlgaros son los más d'ellos, con 286.294, 67.003 y 54.264 cotizantes, respectivamente. Siguiéronlos  portugueses y británicos, con 54.144 y 52.495, y algo más lloñe, los alemanes, con 42.077 afiliaos.
  
Los más de los foriatos que taben afiliaos a la Seguridá Social al finar xunetu encuadrábense nel Réximen Xeneral. Dientro d'ésti, un total de 303.270 foriatos, el 23,6%, trabayaba na hostelería, mientres que'l 16,1% facíalo nel comerciu (207.555 afiliaos) y el 13,9% na construcción (179.144 cotizantes).
 
CATALUÑA Y MADRID CONCENTREN EL 43,9% LOS INMIGRANTES
  
Por comunidaes autónomes, Cataluña y Madrid concentraron cuatro de cada diez foriatos afiliaos a la Seguridá Social en xunetu, al sumar ente les dos el 43,9% del total d'inmigrantes ocupaos. En concreto, Cataluña contaba con 434.177 foriatos cotizantes, mientres qu'en Madrid la cifra yera de 401.023.
  
Tres estes dos rexones asitiáronse Andalucía, con 215.167 afiliaos foriatos; Comunidá Valenciana, con 200.828 ocupaos; Baleares, con 88.196; Murcia, con 87.439; Canarias, con 79.624; Castilla-La Mancha, con 76.639; Aragón, con 67.475; Castilla y León, con 62.501, y País Vasco, con 52.920.
  
Les comunidaes con menor presencia d'inmigrantes en alta a la Seguridá Social al finar xunetu fueron Galicia, con 40.339 foriatos; Navarra, con 26.409; Asturies, con 16.495; Extremadura, con 15.719; La Rioja, con 15.287; Cantabria, con 13.360, y les ciudaes autónomes de Melilla, con 3.961, y Ceuta, con 2.597.