Los postreros 14.000 soldaos de combate d'EEXX colen d'Irak

Los postreros soldaos d'Estaos Xuníos yá colaron d'Irak y tán en terrén de Kuwait, según imformó la NBC, qu'ufiertó imáxenes en direuto del últimu camión del convói militar.

Esta retirada foi confirmada pol capitán Christopher Ophardt, cabezaleru de les últimes unidaes en colar d'Irak --la Cuarta Brigada d'asaltu y la Segunda División d'Infantería--, qu'afirmó que los caberos 4.000 soldaos yá altravesaron la llinde con Kuwait.

En declaraciones a CNN, Ophardt afirmó qu'entá queden dellos soldaos de combate en suelu iraquí pa rematar ciertes xeres alministratives y loxístiques, pero qu'éstos tamién colaran del país árabe a lo llargo del xueves.
  
Lo gordo del repliegue de los últimos soldaos de combate estaunidenses, del que se tuvo conocimientu la mañana d'esti xueves, entamó hai más d'un día, pero caltúvose en secretu por razones de seguridá.
  
Nel país entá dexaran 56.000 soldaos más, anque éstos yá nun realizarán misiones de combate,van llimitase a xeres d'asesoramientu y sofitu de les fuerces de seguridá iraquíes.
 
CERCA DE 4.000 SOLDAOS MUERTOS Y 32.000 MANCAOS
  
Dende la invasión d'Irak por Estaos Xunios hai más de siete años, finaron un total de 4.415 soldaos norteamericanos, y arrodiu 32.000 acabaron mancaos.
  
Alredor d'un millón de soldaos estaunidenses sirvieron n'Irak dende 2003, lo que supón el mayor despliegue de tropes estaunidenses nel extranxeru dende la guerra de Vietnam.
  
Nel momentu la invasión fexóse'l mayor despliegue de tropes d'Estaos Xunios n'Irak, unos 225.000 soldaos a los qu'había qu'añadir los 45.000 de Reinu Xuníu y los cerca de 4.000 d'otres nacionalidaes.
  
Per otru llau, dende l'entamu la ocupación militar morrieren decenes de miles de ciudadanos iraquíes, los más d'ellos pol mor d'atentaos terroristes y d'engarradielles ente les milicies armaes de les comunidaes chií, suní y kurda, les tres más numeroses del país.
  
Según la páxina web 'Irak Body Count', que basa los sos cálculos en informaciones de prensa, fontes hospitalaries, cifres d'ONG y cifres oficiales, el númberu de civiles iraquíes non combatientes finaos dende 2003 ximiélgase ente 97.000 y 106.000.
  
Les más d'estes muertes concéntranse nes primeres selmanes la invasión y nel periodu 2006-2007, cuando se dio una situación cercana a la de la guerra civil ente les milicies armaes chiíes y suníes, según la mesma fonte.