L'ocalitu y la prevención de fueos centren la xunta d'Arce cola Coordinadora

La xestión del ocalitu y la prevención fueos centraron la xunta del director xeneral de Política Forestal, Joaquín Arce, con representantes de la Coordinadora Ecoloxista.

Según informaron Arce nuna rueda de prensa posterior a la xunta, la política de la Conseyería en relación al ocalitu pasa por nun autorizar nueves plantaciones, asina como prohibir les d'otres especies d'ocalitu y eliminar les que se fixieron ensin autorización. Amás, Mediu Rural y Pesca apuesta por aumentar la productividá de les plantaciones ya esistentes.

Pela so parte, el representante de la Coordinadora Ecoloxista, José Manuel Lago, punxo en valor los avances y meyores de la Conseyería nesta materia, y sorrayó la so intención de "dar un pasu más y afitar estes polítiques con calter permanente y definitivu".
  
Amás, apostaron pola prohibición de semar más ocalitos nel Principáu. Nesti sentíu, opinó que los efectos medioambientales y sociales derivaos de la plantación d'ocalitu son "inasumibles", anque "dean beneficios a determinaes persones".
  
La prevención ye'l "mayor déficit" en materia de fueos n'Asturies, según indicó Lago mientres la so intervención. "En investigación y estinción somos punteros, pero en prevención fallase", caltuvo. Por ello señaló la importancia d'actuar sobre les causes de los fueos, relacionaes nun 78,9 por cientu coles males práctiques ganaderes, como la quema nel monte pa crear pación.
  
Según Lago, ye "fundamental" ofrecer alternatives a los ganaderos para finar "la cultura del fueu". Pa él, la solución pasa por evitar que se "saquen beneficios de quemar un monte". Asina, entaino a llantar la prohibición de la curia de ganáu en les fasteres quemaes. Aguaño hai 20 acotamientos vixentes.
  
Arce esplicó al respectu que la prevención de fueos ye un trabayu constante na Conseyería, y enumeró ente les medies previstes la ordenación y planificación forestal, el fomentu del valor de les viesques con sofitos, la investigación de la propiedá, la concentración parcelaria y l'agrupación de propietarios, y l'acotamientu de la curia de ganáu y la vixilancia.
  
Tamién sorrayó la intención de Mediu Rural de prohibir les quemes y controlar l'usu del fueu, asina como de realizar obres de prevención y usar la biomasa como enerxía.
  
Por último, Arce caltuvo qu'a finales d'añu tará llistu'l decretu centráu na prevención de fueos. Según informó, fadrá más facil la tramitación del acotamientu pa la curia de ganáu y afondará nes normes ya llantaes na Llei de Montes.