Los nenos ya nenas de Cangas del Narcea presumen de fala

El pasáu vienres 16 de xineiru, presentóuse en Cangas del Narcea la campaña del Serviciu de Normalización L.lingüística: Miou primer vocabulariu en l.lingua asturiana, una campaña presentada pola Conceyala de Cultura de Cangas del Narcea, Bibiana Martínez y la responsable del serviciu, Mónica Rodríguez Riesgo.
Esta campaña ta enmarcada dientro del Plan de Normalización 2007-2009, en concretu no exerciciu 2008, siendo la so finalidá garantizar la tresmisión del patrimoniu léxicu que los nenos ya nenas de Cangas, cumo falantes patrimoniales la mayoría, yá tienen, ya perpetúala mediante la identificación nos carteles de la variante materna, la  variante occidental. Más que d’aprende-ys un vocabulariu, que ta claro que yá cunocen, lo que se quier faer yá apartar d’él los posibles prexuicios que, por culpa la situación de diglosia que se vive n’Asturias, puedan tener a la hora d’usar el patrimoniu léxicu del que son heriedes.
Asina, los oxetivos básicos serían:la presencia de la l.lingua asturiana dende los primeiros anos d'edá, el refuerzu de la variante l.lingüistica del conceyu, el deprendizaxe del vocabulariu y la dignificación ya pervivencia de la variante.
Pa faelo, dende'l serviciu de Normalización L.lingüística imprimíuse una tirada de carteles de 7 modelos distintos: Na escuela, Na cal.le, No bañu, No patiu, No comedor, El cuerpu humanu, Las figuras xeométricas ya los colores… que se quieren repartir polas escuelas, las ludotecas, los centros de salú ya’l hespital del conceyu.