Manuel García-Galano inagura ‘Culturlingua’

La presentación de ‘Faraguyas’ de Manuel García-Galano, va abrir la segunda edición de les xornaes Culturlingua, un espaciu sobre la cultura y la lliteratura en gallego-asturianu.

A los sos ochenta y ocho año Manuel García-Galano acaba de publicar el so últimu llibru de relatos, ‘Faraguyas’ que va presentase oficialmente esta tarde en Tapia (a les 19.45). El tapiegu ta consideráu unu de los maestros de la escritura en gallego-asturianu y yá tien nel so haber otros títulos como ye'l casu de “Erguendo el telón”, “Mareaxes tapiegos” o “Vento de outono”.

Confiesa qu'ún de los sos mayores oxetivos ye trabayar por que nun se pierdan les pallabres d'antes, por que'l gallego-asturianu llegue intactu a les xeneraciones vinientes. Esta tarde va falar en Tapia precedíu poles palabres de los filólogos Ignacio Vares y José Antonio Fernández Vior.

Tres Galano va intervenir el filólogu Xosé Miguel Suárez que va falar sobre la so última investigación qu'engrosa'l llibru ‘El teatro aldeano da biblioteca popular  circulante de Castripol’. Dambos actos van celebrase nel auditoriu de la casa de cultura.

Esta tarde va tener amás llugar la presentación del Festival Intercélticu d’Occidente. Los que s'averen a Tapia van poder dar un paséu pel centru de la villa onde se va instalar el Mercáu Medieval. Tamién nun baxu del Institutu Marqués de Casariego podrá visitase l'amuesa ‘Polisones y Miriñaques’, un viaxe a la moda de los sieglos XIX y XX.