100 aliaos van xunise a la resistencia ástur de Carabanzo

La llegada d'un centenar de aliaos procedentes de Cantabria, Cartaxena y Astorga va animar el Festival Astur-Romanu de la Vía Carisa qu'aspira a convertise en Fiesta d'Interés Turísticu.

Carabanzo va ser, per quintu añu, escenariu de la batalla que nel añu 26 a C enfrentó a lexonarios romanos y guerreros ástures pola conquista del territoriu. Promovido pola Asociación de Mozos de Carabanzo  y el movimientu asociativu d'esta pequeña población ḷḷeniza, el Festival Astur-Romanu de la Vía Carisa consolidóse como una de les cita obligaes del branu d'Asturies y aspira a convertise en fiesta d'interés turísticu.

Si a la batalla d'años anteriores sumáronse guerreros de Astorga, agora van tomar Carabanzo nuevos aliaos procedentes de Cartaxena y Corrolades del Buelna (Cantabria) que se van xunir a la resistencia ástur contra los lexonarios romanos con mires d'entar nel corazón de l'Asturies Tresmontana.

L'ésitu alcanzáu nes cuatro ediciones anteriores animó a la organización a ampliar los conteníos del cartelu cultural-festivu. Mientres cuatro díes Carabanzo volverá tresformase nun asentamientu ástur que va remembrar les guerres de les tribus locales contra les lexones imperiales de la Roma augusta pela Vía Carisa.

Asina, y con esti escenariu de fondu, l'Asociación de Mozos de Carabanzo –col sofitu de les asociaciones de muyeres, mayores, vecinos y el Club deportivu BTT del núcleu l.lenizu— va poner en marcha, mientres cuatro díes, los duros enfrentamientos d'esti pequeñu requexu ástur, onde un añu más un guerreru ástur volverá tomar como esposa a una bellu moza siguiendo los conseyos del vieyu druida.

Cuatro díes d'actividaes y espectáculos, con trés llargues nueches de conciertos al cargu de grupos locales como “La Coḷḷá Propinde”, “Mokomitas”, “Mapi Quintana” y “Fala Non Caduca” al par de otres formaciones musicales de reconocíu prestíu nel panorama artísticu asturianu, como Vicente Díaz, Dixebra y Mikel Llee Wolve.

Amás de los pasacaiss de lexonarios, les batalles de gladiadores, la puya d'esclavos, el llamamientu a les tribus aliaes, la recreación d'una casa señorial romana y la invocación a diversos dioses el organizadores incluyeron esta edición –como zarru espectacular a la fiesta—los sacrificios al Dios romanu del Inframundou coles sos criatures que van apavorar a los ástures, yá sometíos al xugu romanu.  

La organización espera sumar más visitantes a los 5.000 que na pasada edición animaron a la resistencia ástur de Carabanzo. La organización del eventu, con un presupuestu total cercanu a los 75.000 euros va cuntar un añu más col sofitu financieru del Conceyu de L.lena y la collaboración de Cajastur, el Programa Leader del Monte Central d'Asturies, la Conseyería de Cultura y Turismu y l'Institutu Asturianu de la muyer.