El Bloque diz que Blanco rise d’Asturies

El Bloque por Asturies califica de partidista y chancia la visita del Ministru de Fomentu, José Blanco a Asturies, “vuelven tomar el pelo a cuenta de les infraestructures y les inversiones”.

Los nacionalistes califiquen la visita de decepcionante y chancia son los únicos la visita del Ministru de Fomentu al nuestru país. “Asturies y los asturianos nun merecen el tratu y el despreciu del Gobiernu español que manda a un ministru a falar por nun callar, y nin siquier s’atreve a poner un númberu o una fecha enriba la mesa pa solucionar el problema de les inversiones n’infraestructures que tenemos nel nuestru país”, afirma la organización.

Pal Bloque, los retrasos n’obres vitales a la hora vertebrar el territoriu son insoportables, “seguramente sea la vergüenza que-yos produz a los responsables políticos poner feches que siempre se van retrasando llévalos a callar esta vez nun vaiga ser que-yos medren les narices y acaben como Pinocho nel cuentu”.

Al empar, afirmen que l’únicu oxetivu de José Blanco con esta visita ye da-y un minutu de gloria al candidatu del PSOE, Javier Fernández, “pa resolver la obsesión que tienen dientro del partíu de que nun lu conoz nadie y hai qu’enseñalu nestos nueve meses que queden pa les elecciones”.

“Taba bien saber si alguién del Gobiernu asturianu van mirar porque se respeten los derechos y la dignidá d’esta tierra y de la xente que vive equí o van volver repartir los roles ente quien aplaude pa ser simpáticu a los sos amos y quien mira pa otra parte esperando que pase la tormenta y abocane”, diz el Bloque pa finar.