Sanjurjo aconseya a los vecinos del Muselín vender la casa

El conceyal d'Urbanismu de Xixón, Pedro Sanjurjo, aconseyó a los vecinos del Muselín vender les sos viviendes, dientro de la operación urbanística prevista en la Ronda Oeste.

Sicasí, calcó que'l que quiera va poder siguir viviendo nelles. Sanjurjo recordó que'l documentu de revisión del Plan Xeneral d'Ordenación (PXO) prevé que'l Muselín torne nun gran espaciu verde asemeyáu al de los Pericones, dada la peligrosidá xeolóxica del terrenu.
  
Asina lo indicó en rueda prensa na que fizo un repasu a les principales actuaciones urbanístiques de la so Conceyalía nel marcu de la Feria Internacional de Muestres d'Asturies (Fidma), y n'especial del nuevu PXO, que na so tramitación lleva pareyu'l reentamu de los planes especial y parcial non aprobaos antes de la nulidá del anterior planiamientu urbanísticu de Xixón, como'l casu de Cabueñes.
  
En cuanto al Muselín, esplicó que van ser los promotores de les cuatro unidaes d'actuación incluyíes nel Ámbitu d'Ordenación Específica de la Ronda Oeste los que tengan que negociar colos vecinos la venta de les sos cases.
  
Coles mesmes, calcó en que nesa zona contémplase la reserva de 130.000 metros cuadraos d'espacios verdes y d'equipamientos públicos, que se van despachar a lo llargo d'una gran avenida -asemeyada a la d'El Llanu_dende'l Cerilleru hasta L'Arbeyal, igual que se quier que'l Muselín seya otru parque de los Pericones.
  
Sanjurjo calcó en que dende'l puntu de vista xeolóxicu nun ye recomendable'l Muselín p'área residencial polos riesgos que conlleva. Por esti motivu, indicó que quier dir mercándose les propiedaes de forma negociada, pa capitalizar l'esfuerzu de los vecinos pa construyir les sos cases ellí.
  
Nesti sen, el conceyal yá avanzó que va ser un trámite llargu y punxo d'exemplu'l desarrolláu nel parque de los Pericones, que correspuende al Plan Rañada de 1983 y del que tovía queden "remates" por facer. "Ofrecémos-yos una puerta de salida pa que les propiedaes nun pierdan valor", repostió.