Activistes marroquinos bloquien la entrada d'alimentos en Melilla

Un grupu d'una trentena de marroquines, que dicen pertenecer al Comité pa la lliberación de "Ceuta y Melilla", boicotió'l pasu de mercancíes marroquines hacia Melilla.

Too ello a pesar de la llamada del rei Xuan Carlos a Mohamed VI cola que s'esperaba que les agües volvieren al so calce tres un mes de quexes oficiales por supuestes agresiones de la Policía española a ciudadanos marroquinos nesa frontera.
  
La protesta desarrollóse nel puestu fronterizu de Beni-Enzar, -l'únicu que cuenta con aduana comercial de los tres que dixebren Melilla de Marruecos- y fízola un grupu qu'encabeza Abdelmonaim Chouki y qu'obligó a dar media vuelta a furgonetes y otros vehículos que tresportaben pexe, verduras y hortolices pa los mercaos de Melilla.
  
L'amenaza de boicó del llamáu "Comité pa la Lliberación de Ceuta y Melilla" cumplió esti xueves a lo último la so amenaza, dempués de dos intentos anteriores fallíos, como los asocedíos el llunes y martes, y xusto un día dempués de que'l Rei d'España llamara per teléfonu al Rei de Marruecos Mohamed VI pa evitar que "tracamundios o pequeños problemes" alterien la relación billateral.
  
Los manifestantes alvierten qu'esti boicó, que coincidió col entamu en Marruecos y en Melilla del mes d'ayunu de los musulmanes, el Ramadán, va prosiguir tamién el vienres y el sábadu.
  
Los mercaos de pexe, frutes y hortolices de Melilla trabayaron cola metá de los puestos abiertos, pero nun hai problemes nel suministru porque esti tipu de productos tamién pue atopase nos supermercaos que se nutren d'artículos trayíos dende la Península, anque a un preciu un poco mayor.
  
Unos de los pescaderos consultaos por Europa Press, Mohamed, llamentó que tea asocediendo esti tipu de boicó "porque esto perxudica tanto a marroquinos como a melillenses que viven d'esti negociu a ún y otru llau de la frontera".