Darréu acusa a PP y PSOE de la emigración de la mocedá

Darréu diz que l’asturianismu lleva 30 años denunciando la perdida de mocedá y culpa a PP y PSOE de la situación. Amás, pide a la mocedá que lluche y s'organice.

Según l’Institutu Asturianu d’Estadística y l’estudiu ‘Juventud en Asturias’, son cuasi 82.000 los mozos qu’Asturies perdió dende 1991. Según l’estudiu, la mocedá d’ente 15 a 29 años representaba en 1991 el 22% de la población total d’Asturies, mientres qu’anguaño namás representa’l 15%.

Dende Darréu  afirmen que dende los años 80 coleutivos políticos, sobremanera del ámbitu soberanista, lleven denunciando esta realidá, “munches vegaes acusaos de catastrofistes, güei vemos que los catastrofistes teníen y tenemos razón”.

Amás, responsabilicen a los gobiernos de PSOE y PP como cómplices de la situación. “Nun podemos escaecer que la estratexa pela so parte ye nidiamente consciente ya intencionada, cola fin de desactivar a la mocedá, principal fuercia de tresformación social y conderga al país a una situación de inmovilismu ensin precedentes”.

La organización de mocedá diz qu’Asturies nun pue protexese por si mesma mentantu tea nun procesu de desindustrialización y privatización, “el mesmu que ta enllenando de dineru a la oligarquía y los políticos que malgobiernen el país”.

Poro, afirmen que la meyor manera de finar cola situación ye la desobediencia civil contra l’Estáu Español y los políticos que lu representen n’Asturies. Asina como amosar el so refugu al sistema lliberal “qu’afuega esti pueblu” y organizase.

“Namái faciéndonos respetar como xóvenes conscientes y activos, podremos finar con esta situación de destierru y venta d’Asturies al capitalismu en crisis. Los caciques que caltenemos coles nueses perres tienen de sabern que la mocedá tien derechu a un trabayu dignu na so tierra de ñacencia”, apunten pa finar.