El Bloque pide midíes contra la llingua azul

El Bloque por Asturies ta preocupáu con que vuelva apaecer la llingua azul n’Asturies, igual que ta pasando yá n’Andalucía, y piden que se paguen les indemnizaciones.

“Llamentablemente paez que la enfermedá de la llingua azul vuelve a la Península Ibérica y la obligación del Gobiernu asturianu ye tar preparáu pa prevenir el mal y que nun pase lo mesmo qu’hai dos años cuando morrieron n’Asturies más de 2.000 oveyes ensin contar el resto’l Gansu”, apunta la organización.

Afirmen qu’hubo xente que quedó prácticamente na ruina al morré-y casi tolos animales directamente, “eso ensin contar los efectos secundarios como los albuertos, en muchos casos según denuncién los ganaderos pol efectu secudariu de les vacunes”.

A parte del mal económicu,recuerden qu’hai munches races autóctones que tienen el peligru de poder desaniciase y una andancia d’estes pue llevales a la extinción. “Por suerte nel casu de les oveyes xaldes hubo menos problema cola enfermedá de la llingua azul que les races de fuera y fueron bien poques les que morrieron, anque nun nos podemos enfotar y hai que tar sollertes”, solliñen.

El Bloque diz que ye obligación de l’alministración mirar polos intereses de la xente ganadero por ser un de los sectores que más tán sufriendo les últimes décades pola política comunitaria y l’abandonu de la zona rural mayormente.

“Tampoco ye normal que depués de tanto tiempu l’alministración competente siga ensin acabar de pagar los daños que-yos corresponden de lo que yá tán fartucos de protestar los sindicatos y los afectaos”, señalen pa finar.