Los promotores asturianos tachen de "antiasturiana" la gala del 8-S

L'Asociación de Promotores Asturianos tachó de "antiasturiana" y "insultante" la programación la gala del Día d'Asturies entamada pola Sociedá Rexonal de Turismu.

Asina, considera que se despreció al colectivu y que nun se representa de nenguna manera a la cultura asturiana, polo qu'esixen una programación alternativa. Al traviés d'una comunicáu, los promotores espresaron el so malestar ante l'anunciada programación, qu'inclúi l'actuación d'artistes como Isabel Pantoja, Sergio Dalma o Chenoa.
  
"Ye un casu únicu n'España qu'a los promotores musicales de la comunidá nun se-yos tenga en cuenta a la hora de programar y collaborar nos actos conmemorativos rexonales, o sea d'una manera miserable, algo que consideramos insultante, col agravante de l'actual crisis na tamos sufriendo", critica l'asociación.
  
Dende'l so puntu de vista, "la promoción que xeneraría la retresmisión de la gala nun representa de nenguna manera a la cultura asturiana, cuando esta fecha sería una bona oportunidá pa mostrar la realidá de la riqueza cultural de la rexón". Señalen amás que "la música asturiana xenera añalmente empleos y ye una fonte d'arriquecimientu cultural".
  
Por esti motivu, los promotores esixen "que se retire de la programación la gala de televisión del Día d'Asturies y se presente una alternativa con artistes representativos de la música asturiana pa que sirvan como promoción de la nuesa cultura, amás de considerase les propuestes de los que conocen realmente los movimientos musicales asturianos, pa que puea celebrase d'esta manera'l Día d'Asturies col arguyu que merecemos tolos asturianos".
  
Amás, piden que s'esclare públicamente'l "verdaderu acuerdu global del Gobiernu asturianu coles empreses del productor José Luis Moreno, nes programaciones culturales (Día d'Asturies, Llaboral y RTPA)".
 
TURISMU DIZ QUE YE "AMBICIOSA"

Mientres, la presidenta de la Sociedá Rexonal de Turismu, Noelia Menéndez, cree que los actos programaos pal Día d'Asturies respuenden a "una apuesta ambiciosu pa captar turistes". Valoró d'esta manera la programación, que nel so aspectu musical (conciertos de dellos artistes como Isabel Pantoja, Chenoa o Sergio Dalma), recibió crítiques dende diversos sectores, ente ellos el Bloque por Asturies y el sociu de gobiernu del PSOE, Izquierda Unida.

"Los actos del Día d'Asturies respuenden esti añu a una apuesta ambiciosa pa captar potenciales turistes", señaló. Nesti sen, Menéndez afirma: "teniendo como fin la proyección esterior del eventu y la promoción turística d'Asturies, esti añu, siguiendo la filosofía de que los nuesos grandes eventos valgan de reclamu al turista, entamemos un gran eventu de cinco díes de celebración que va valir pa fortalecer el gran motor económicu nel que ta tornando'l turismu na nuesa comunidá".
  
Según informó la SRT al traviés d'una nota de prensa, al mediu millón de persones que s'estima que va acudir a la celebración del Día d'Asturies en Ribasella, hai que sumar los 300.000 espectadores de la TPA, que va retresmitir el día 8 de setiembre la Gala del Día d'Asturies de forma íntegra.
 
PROGRAMACIÓN DE LA LLABORAL
  
De la mesma manera, valoró "la nueva programación presentada por Recrea pa la Llaboral", que va incrementase, "gracies a la inclusión d'eventos culturales de relevancia nacional y europea, nun elementu más de reclamu turísticu pola so abertura al públicu masivu, tanto asturianu como foriatu".
  
El centru cultural va acoyer nes próximes selmanes delles actuaciones que van variar la llinia artística siguida hasta'l momentu, como por exemplu funciones de zarzuela y ópera, 'El show de los Lunnis', o l'actuación d'Isabel Pantoja.
  
Según Menéndez, "esti xiru, realizáu de cara a la nueva temporada cultural, ofrez nuevos tintes a la estratexa turística del Gobiernu del Principáu y respuende a la demanda del sector turísticu, que manifestó, mientres una xunta'l pasáu mes de xunu colos xerentes de la SRT -Noelia Menéndez- y Recrea -Alejandro Calvo- el so interés n'apoyar y comercializar una programación alternativa, más abierta y accesible al gran públicu".