Colombia y Venezuela restablecen les sos relaciones

El presidente de Colombia, Juan Manuel Santos, y el so homólogu venezolanu, Hugo Chávez, decidieron restablecer les relaciones diplomátiques y comerciales ente los dos países.

"Decidimos que los dos países restablezan les sos relaciones diplomátiques y rellancen una fueya de ruta pa que tolos aspectos de la relación puean progresar, avanzar, afondase", afirmó Santos nes sos primeres palabres tres l'alcuentru de más de tres hores calteníu na población colombiana de Santa Marta, asitiada nel norte del país.
  
Nesta xunta decidiéronse crear cinco comisiones de trabayu mistes pa debatir temes billaterales como'l pagu de la deuda, la cooperación económica, la inversión social na zona fronteriza, el desarrollu conxuntu d'obres d'infraestructura y tamién una comisión encargada de los asuntos de seguridá.
  
Santos afirmó amás que Chávez compometióse a nun tolerar la presencia en territoriu venezolanu de grupos "al marxe de la llei", en referencia a les Fuerces Armaes Revolucionaries de Colombia (FARC) y l'Exércitu de Lliberación Nacional (ELN).
  
"Por seguridá, el presidente Chávez dixo de toles formes, y díxolo en 'Aló Presidente', el domingu pasáu, y repitiólo güei, qu'él nun va permitir la presencia de grupos al marxe de la llei nel so territoriu. Eso ye algo importante, ye un pasu importante pa qu'eses relaciones se caltengan", afirmó Santos.
  
Fueron precisamente les acusaciones per parte de Bogotá de que Caracas acoyía a miembros de les FARC y del ELN nel so territoriu, que dempués realizaben incursiones en Colombia, lo que provocó la rotura diplomática y comercial ente los dos países el pasáu 22 de xunetu.