Iglesias diz que’l programa del 8-S “nun me pon”

El coordinador d'IX, Jesús Iglesias, fixo un llamáu a l'austeridá y defendió que la xente puea divertise ensin gastos descomanaos. Amás, solliñó que’l programa del 8-S nun-y pon.

Asina lo dixo antes de reconocer que la programación de conciertos pa la celebración del Día d'Asturies nun espierta nél "nengún interés", anque dexó claro que ye respetuosu colos gustos musicales de caún.

Iglesias, en rueda de prensa na Feria Internacional de Muestres d'Asturies (Fidma), acompañáu del diputáu estatal d'IX, Gaspar Llamazares, llamentó que nun s'aprovechara'l momentu de convertir esa celebración nuna gran romería d'Asturies, en llugar gástase abondo más nos actos yá programaos.

"Nun me pon", aportunó sobre los actos programaos. Pa él, hai munchos festexos y actuaciones mientres el branu nel Principáu, polo que nun ye precisu facer nada "estraordinariu, hestóricu o nunca vistu".

Nesti sentíu, los conciertos yá confirmaos pa esta edición del Día d'Asturies son: Sergio Dalma, Chenoa, Isabel Pantoja, Rosa, Daniel Diges, Tamara, Soraya, Innocence, Mirko (ilusionista) y Mercadance (Nacho Cano), unes actuaciones criticaes por dellos sectores asturianistes, como'l partíu Bloque per Asturies, que llegó a pidir la dimisión de la conseyera de Cultura, Merced Álvarez.