Rafa Palacios participa en Bogotá nel alcuentru 'Colombianos pola paz'

El voceru del Bloque, Rafa Palacios, va visitar Colombia del 12 al 14 d'agostu convidáu pola Senadora Piedas Córdoba, Presidenta de la Comisión de Paz del Congresu Colombianu.

Mientres esta visita, Rafael Palacios, va participar na presentación de les propuestes Americanes y Americanos pola Paz" y "Europees y Europeos pola Paz", amás de diversos eventos políticos.

El voceru nacional del Bloque por Asturies, Rafael Palacios, va participar nel alcuentru internacional que "Colombianes y Colombianos pola Paz" que se va celebrar en Bogotá el 12 y el 13 d'agostu, nel que se va presentar una propuesta de paz, un balance y una mirada en perspectiva pa la busca d'una salida al conflictu armáu internu" en Colombia.

"Colombianos y Colombianes pola paz", ye un grupu de la sociedá civil, compuestu por políticos, intelectuales, académicos y ciudadanos y ciudadanes, col principal oxetivu de trabayar pola paz, intentando consiguir xestos de les partes, que se perfilen como mecanismos de credibilidá pa xenerar una mesa de negociación pal resolvimientu del conflictu social y políticu que vive Colombia y consiguir una paz duradera".

Ún de los pasos iniciales foi la concreción d'un Alcuerdu Humanitariu que dexe la lliberación de les persones en poder de la guerrilla de les FARC y coles mesmes, la llibertá de los presos d'esti grupu armáu nes cárceles colombianes.

Esti Alcuerdu Humanitariu, propúnxose como'l prólogu d'una salida axustada al conflictu qu'avere la paz en Colombia y dexe la reconstrucción del país. Nésti propósitu "Colombianos y Colombianes pola Paz", llogró la mediación y la lliberación de 13 secuestraos en manos de les FARC.

El voceru nacional del Bloque por Asturies, Rafael Palacios, va participar los díes 13 y 14 d'agostu nel Congresu "Aportes de la Izquierda en el Proceso Político Colombiano" y va caltener xuntes de trabayu col Comité de Selección del Programa Asturianu d'Atención a Víctimes de Violaciones de los Derechos Humanos en Colombia y coles organizaciones de Derechos Humanos que tán denunciando la esistencia de la Fuesa Común de La Macarena, Departamentu de la Meta, nel sur de Colombia.