Asturies perdió cerca de 70.000 mozos nos últimos 20 años

Asturies perdió unos 70.000 mozos nos últimos 19 años, según estimaciones incluyíes nel estudiu 'Mocedá n'Asturies', ellaboráu pol Institutu Asturianu d'Estadística.

Según los datos, los habitantes d'ente 15 y 29 años representaben en 1991 el 22% de la población total de la comunidá, mientres que nesti momentu queden un 15%.
  
Asina lo anunció güei la directora del Institutu Asturianu d'Estadística, Encarnación Rodríguez Cañas, qu'ofreció una rueda de prensa, acompañada pol director del Institutu Asturianu de la Mocedá, Guillermo Martín, p'anunciar la publicación del estudiu. Los sos datos van apaecer nun dípticu que se va repartir el próximu día 12 cola prensa diaria.
  
Tres estimar que'l descensu de población moza, en númberos absolutos, sería d'unes 70.000 persones, la directora consideró que la principal razón d'esta cayida ye'l menor númberu de nacimientos. Sicasí, Guillermo Martínez esplicó que la llinia ye asemeyada a la del restu d'España y d'Europa, pues recordó que nel mesmu periodu la población del país aumentó n'ocho millones d'habitantes, mientres que la de moces baxó en 800.000.
  
L'estudiu destaca tamién el fechu de que dientro d'esta franxa d'edá hai un 9% de componente estranxeru, que dobla al 4% de residentes foriatos de la población total.
  
El documentu reflexa la situación de la mocedá asturiana según otros criterios, por exemplu'l de la educación. Más de la metá de los mozos (52%) son estudiantes universitarios, de los que les muyeres representen el 55%.
  
No referente a la situación nel mercáu llaboral, el 33% de la población ocupada ye menor de 35 años, y la tasa de paru de los mozos asturianos (menores de 25) ye del 35,4%, frente a la media española de 37,9%. Sicasí, tamién son inferiores a les medies españoles la tasa d'actividá (44,8% frente al 49,%5 d'España) y la tasa d'empléu (29% frente al 30,8%).
  
Nesti puntu, Martínez señaló que los mozos asturianos fueron retardando la so incorporación al mercáu llaboral nos últimos años, lo que se reflexó nos datos de desempléu d'esti sector.
  
Dientro del ámbitu llaboral destaca tamién que casi'l 50% de los mozos d'ente 25 y 29 años tienen un trabayu que nun guarda realción a los sos estudios, frente a un 35% que sí ven vinculación. La diferencia ye mayor cuanto menor ye la edá del sector.
  
Según los estilos de vida, los mozos asturianos suelen empezar relaciones estables primero que'l restu d'españoles, pero tarden más n'empezar la convivencia en pareya. Un 62% declara realizar algún tipu d'actividá física, y un 89% utiliza métodos anticonceptivos nes relaciones sexuales.
  
A lo último, como curiosidá, Martínez señaló qu'un 41% de los mozos asturianos almite lleer la prensa a diario, y que la mocedá asturiana demuestra "ser más participativa"