Netanyahu declara qu'investiga l'asaltu a la flota con ayuda pa Gaza

El primer ministru israelín, Benjamin Netanyahu, dixo que nun pue dexase "d'inorar una amenaza pa la esistencia d'Israel" mientres la investigación del ataque a la flota d'ayuda a Gaza.

La flota, qu'intentaba llegar a la Faza de Gaza con mercancía humanitaria esquivando'l bloquéu israelín, resultó asaltada n'agües internacionales pola Armada hebrea, que realizó delles alvertencies  pa que nun siguiera'l so camín hacia Gaza.

El primer ministru foi'l primer testigu en declarar ante la comisión gubernamental de siete miembros presidida pol ex maxistráu del Tribunal Supremu Jacob Turkel y na que participen dos observadores estranxeros.
  
"L'Estáu d'Israel y les Fuerces Armaes israelines operaron según el Derechu Internacional", dixo Netanyahu. "Como primer ministru, nun pueo inorar a Hamás como una amenaza pa la existencia d'Israel", añadió.
  
El voceru de Netanyahu, Nir Hefetz, en declaraciones a los medios de comunicación, dixo que la comisión Turkel nun ye un "organismu antiisraelí", al contrario que la comisión de Naciones Uníes, encabezada pol xuez Richard Goldstone, sobre la ofensiva israelina contra la Franxa de Gaza en xineru del 2009.
  
La comisión Turkel ta investigando les circunstancies qu'arrodien al ataque israelín contra la flota integrada por seis embarcaciones turques. Según Hefetz, la comisión "da fe de la forma na que l'Estáu d'Israel, conforme a los más altos estándares internacionales, ta dispuestu a enseñar les sos cartes y dicir 'Nun tenemos nada qu'esconder'". Sicasí, Israel nun va cooperar nuna segunda investigación a cargu del Conseyu de Derechos Humanos de la ONU.
  
El mes pasáu, una investigación del Exércitu israelín consideró qu'hubo errores de planificación nel incidente, pero defendió l'usu de la fuerza per parte de les tropes. Esta selmana van declarar tamién ante la comisión Turkel el ministru de Defensa, Ehud  Barak, y el xefe del Exércitu, xeneral Gabi Ashkenazi.