El Bloque esixe al Principáu que defenda Asturies en Madrid

El Bloque esixe al Principáu que ponga fin al so “antroxu particular” y dexe de retayar empleos, ayudes y polítiques sociales y defenda los derechos d’Asturies en Madrid.

El Bloque por Asturies considera intolerable que, “pente medies de una representación más propia d'una tragicomedia”, pretendan amosar sorpresa ante la lletra pequeña y lo non escrito de la llamada ‘Llei d'Axuste’, “que contempla graves retayos n'empléu, ayudes y polítiques sociales”.

Pa la organización, ye una mentira dicir que'l retayu de sueldos de los emplegaos públicos n’Asturies obedez al cumplimientu d'un Real Decretu. “El Gobiernu del Principáu retayó'l sueldu a los emplegaos públicos más allá de lo que correspondía al obligáu cumplimientu”, señalen.

Afirmen amás, qu’agora toca retayar y esaniciar puestos de trabayu, ayudes y polítiques sociales, “de siguío, va venir el copago sanitariu, la eliminación de puestos de trabayu n'educación y el fin de les polítiques sociales”.

El Bloque esixe al Principáu qu’abandone los intereses partidistes, defenda realmente los derechos de Asturies ante'l Gobiernu socialista de Madrid y de una respuesta contundente a les “permanentes agresiones” contra Asturies.

“Nun pue consentise que cada día, comuníquese a los asturianos una nueva midida que pon en peligru miles de puestos de trabayu y lastra el futuru de la nuesa comunidá, mientres el Gobiernu del Principáu d'Asturies calla, intenta xustificar lo inxustificable y amuesa una actitú de complicidá intolerable”, señalen.

El Bloque por Asturies denuncia la incapacidá del Gobiernu del Principáu pa defender los derechos de los asturianos y asturianes ante'l Gobiernu de Madrid, “nun dexa de ser una evidencia'l silenciu clamoroso del candidatu socialista a la Presidencia del Principáu. Suponemos que na próxima fiesta de Rodiezmo, nun va funcionar la megafonía”.

“El so intolerable siguidismu, complicidá y silenciu ante les polítiques que ponen en peligru'l futuru de Asturies, la so política de permanente agresión a los trabayadores públicos, la so ineficacia pa resolver los problemes d’Asturies y la so habilidá pa demostranos cada día que'l verdaderu problema son ellos y les sos polítiques fracasaes”, apunten pa finar.