El PAS diz que la espropiación del Muselín ye un atracu

El PAS opónse a la desapaición del barriu del Muselín y considera un “atracu a mano armada” la espropiación pola que 200 vecinos van quedar ensin la so vivienda.

“Creemos que ye llamentable que'l Conceyu nun avise directamente y de manera oficial a los vecinos afectaos por dicha decisión”, afirma la organización.

El pasáu 30 de xunetu, aprobóse nel Conceyu'l Plan Xeneral d'Ordenación Urbana, “por cierto mala fecha por tar en mediu del branu'l períodu d'esposición pública cuando muncha xente ta fuera de la ciudá y ye más difícil contactar con un abogáu”, indiquen.

Nesi nuevu Plan establezse la fulminación del barriu, nel cual, según la organización, vive muncha xente nuevo que ta hipotecada y gastóse enforma dineru en mercar ya iguar la vivienda, “y agora el Señor Sanjurjo asegúralos que ye pol so bien, ente que dalgunos tán hipotecaos mientres 25 años”.

Dende’l PAS esixen al Conceyu qu'escuche a los vecinos del Muselín, la paralización del Plan y llamen a la sociedá a movilizase “contra los atracos urbanísticos a los que PSOE ya IX tiénennos avezaos”.