Iglesias condiciona'l pautu a caltener la inversión y el gastu social

El coordinador xeneral d'IX, Jesús Iglesias, condicionó la continuidá del alcuerdu de Gobiernu al caltenimientu de la inversión pública y el gastu social nos presupuestos de 2011.

Asina lo señaló en declaraciones a los periodistes, mientres la rueda prensa que'l so compañeru, Gaspar Llamazares, ofreció n'Avilés tres la so visita al Centru Niemeyer.

Acabante esixir el caltenimientu de la inversión pública y del gastu social en tiempos de crisis, preguntáron-y pola continuidá del pactu de gobiernu en casu de que l'Executivu nun aceptare estes esixencies na recta final del mandatu.
  
"La recta final del mandatu tien que correspondese col mandatu y col alcuerdu de Gobiernu", señaló Iglesias, pal que "nun cabe dicir que como tamos na recta final pue tirase pela borda'l bagaxe políticu d'estos años de Gobiernu compartíu".
  
"Pa caltenelu hai que caltener les prioridaes nel presupuestu y nel gastu. Esti presupuestu va tener que ser coherente colo comprometío y con lo qu'Asturies precisa", afirmó, porque dende'l so puntu de vista "los ciudadanos en situación de crisis precisen más l'apoyu y el respaldu de les alministraciones". "Queremos qu'Asturies siga siendo una demostración de que les polítiques solidaries en tiempos de crisis nun sólo son necesaries sinón que son posibles", señaló.
  
Antes, Iglesias realizare una férrea defensa de la inversión pública y del gastu social. Dende'l so puntu de vista "ye imposible que nun contestu económica nel que les empreses siguen col grifu del creitu zarráu, éstes puean contribuyir a la inversión pública". Exemplificó col casu de l'autovía AS-3 (Avilés-Uviéu), "que nun se podrá poner en marcha con peaxe a la solombra, como l'AS-2, porque se detectó que los mecanismos que l'AS-2 nun producíen los recursos comprometíos pa l'amortización".
  
Por ello, señaló, "pensamos que la inversión pública ye necesaria, xenera empléu y produz infraestructures". Reconoció que "va resultar difícil encaxar el caltenimientu de partíes d'inversión con otres de gastu social", pero "el presupuestu va tener que tener infraestuctures y tamién recursos pa la sanidá y les prestaciones sociales, porque tamién se xenera empléu col gastu social".