UNA diz que la marcha del Bloque abre posibilidaes d'alcuerdu

Unidá Nacionalista Asturiana considera que la salida del Bloque del Gobiernu abre posibilidaes reales pa un alcuerdu "qu'ufierte una alternativa con posibilidaes en 2011".

La Xunta Xeneral d'UNA, máximu órganu decisoriu de la organización ente congresos, valoró na so última xunta ordinaria la salida del Bloque por Asturies del gobiernu, la so rotura con IX y la so propuesta, manifestada al traviés de dellos medios, de trabayar conxuntamente con otres formaciones polítiques y sociales pa ufiertar una plataforma unitaria asturianista, d'esquierdes y ecoloxista nes eleiciones de mayu de 2011.
 
UNA valoró na citada xunta de forma positiva esti pasu del Bloque, "yá que abre mires clares de construcción de lo que la ponencia política d'UNA, aprobada por amplia mayoría nel so Congresu del pasáu mes de marzu, denominaba 'Espaciu Políticu Asturianu', y nel que se plantegaba la necesidá d'una alternativa política propia que saque d'una vegada por toes al asturianismu políticu de la marginalidá y la dependencia d'otros proyectos".

Sicasí, dende UNA planteguen que la propuesta que se realice a la sociedá tien de ser lo más integradora, abierta, flexible y amplia, "polo qu'hai de trabayar con voluntá de construyir una alternativa qu'axunte'l votu asturianista, a la que se sumen otres formaciones polítiques y colectivos sociales, y que supere la capacidá d'influencia de caúna de la formaciones qu'apuesten por ella". 
 
Poro, UNA fai un llamáu a la xenerosidá y al trabayu común "pa que por fin n'Asturies puea esistir una alternativa asturiana a PSOE, IX y PP, y qu'ilusione a bona parte de la población que pide un cambéu réxime, una fuerza político propia y aire fresco na política asturiana".