La UABRA va acoyer una presentación especial del vinu Ḷḷumés

Güei, vienres día  6 d’agostu, la UABRA (Universidá Asturiana de Branu) va acoyer la presentación de Ḷḷumés, el primer vinu etiquetáu n’asturianu.

Según informa’l Serviciu de Normalización de Cangas del Narcea, “atendiendo al éxitu col que se recibíu la primer puesta n’escena de la primer añada de vinu de marca L.lumés, Bodegas Oubanca, s.l.  vei aproveitar pa presentar nuevamente esti caldu  ente los asistentes a los cursos formativos”. 
 
La presentación va facese a les 20:30  na Escuela Hogar de Cangas del Narcea, “ya nel.la tódalas personas asistentes van poder tastiar esti bon vinu”, indiquen.

El vinu ye variedá única nomada verdéu tintu, que namás esiste en Cangas del Narcea. El vinu ta criáu en cepes centenaries y tuvo mientres nueve meses nuna barrica de carbayu francés.

Ye la primer vez que se va comercializar un vinu etiquetáu n’asturianu, amás tien el nome d’una parroquía de Cangas del Narcea. La empresa quixo dedicar esta bebida a tola xente qu’ama la llingua asturiana, n’especial a los cangueses.

Problemes por usar la llingua

Bodegas Oubanca fixo apueste pol asturianu como dalgo novedoso nel etiquetáu del vinu. Sicasí, la iniciativa nun-y traxo más que problemes.

Pa entamar la  Conseyería de Mediu Rural esixó un etiquetáu billingüe asturianu/castellán pa dar el preste a la iniciativa. Llueu, el Conseyu Regulador del Vinu de Cangas vetó la presencia del vinu na IV Feria del Vinu de Cangas por tar etiquetáu n’asturianu. Anque depués anunciaron que nun teníen nengún problema col etiquetaxe y dixeron que’l vetu venía pola so calificación y orixe.