Sastre anuncia continuismu

El nuevu conseyeru d'Educación, Herminio Sastre, dixo al xurar el cargu que va siguir “colos programes, planes y persones" colos que yá trabayaba como viceconseyeru.

 Satre animó a nun ver les coses de forma particular porque "los recursos públicos nun tán pa eso". "Tola sociedá tien de beneficiase de lo que faigamos", respondió. El yá Conseyeru pronuncióse nestos términos na sede de la Presidencia del Principáu al ser preguntáu pola manifestación convocada este mesmu vienres pol sindicatu Suatea polos retayos de directores nes escueles públiques de 0 a 3 años.
 
El nuevu cargu del Gobiernu asturianu reconoció'l derechu a manifestase como propiu de les sociedaes democrátiques y aseguró que va estudiar les propuestes, anque la so intención ye siguir colo que ta faciendo la Conseyería. "Vamos ver a llargu plazu si les propuestes resuelven lo fundamental que ye, nesti casu, que los neños de 0 a 3 años tengan un serviciu docente afechu y positivu", esplicó.
 
El nuevu conseyeru indicó que tamos nuna dómina de "munches demandes y pocos recursos" y animó a utilizar "la intelixencia, el compromisu y la solidaridá", asina como nun ver les coses de forma particular".
 
El sucesor d'Iglesias Riopedre confirmó que va aconceyase colos sindicatos n'analizando les temes col equipu de la Conseyería y defendió que "facer política ye trabayar na coincidencia y na discrepancia".
 
Sobre'l nuevu cursu, amosóse esperanzáu en que los conflictos "puedan enriase col diálogu" y repitió el so apueste pola calidá y l'excelencia de la educación, como esixe'l Gobiernu d'España.