El nacionalismu llama a sumase a la manifestación de Suatea

El Bloque y UNA faen un llamáu a participar na manifestación contra les ordes de la Conseyería d'Educación na convocatoria de places de dirección d'escueles infantiles de 0 a 3 años.

La manifestación va celebrase n’Uviéu mañana, vienres 6 d'agostu a les 12:00 hores. El Bloque por Asturies aprovechó p'acusar al Principáu d'atacar a la enseñanza pública y empecipiar el procesu d'esmantelamientu de la Rede d'Escueles Infantiles de 0-3 años col cese de les persones responsables de les Direcciones d'estos centros.

“Esta midía pon en peligru la inclusión d'esti ciclu como una parte más de la rede asturiana d'enseñanza pública, balerándola de conteníos formativos y educativos”, afirma la organización. El Bloque señala que’l Gobiernu d´Asturies, “de forma autoritaria y prepotente”, toma una midía ensin cuntar con sindicatos, asociaciones de padres y madres, y trabayadores.

“Vuelven fuxir del diálogu y escuéndense detrás de les vacaciones de branu pa tapar les sos vergüences, eludir les sos responsabilidaes y tomar una midía que va contra la calidá educativa y los intereses de les families asturianes que demanden cada vez más esti ciclu”, señalen.

El Bloque por Asturies considera fundamental el caltenimientu de los Equipos de Dirección, “polo que les midíes tomaes convierten en insostenibles los centros, provoquen inestabilidá y ponen en peligru'l so futuru”.

Afirmen, amás, que ruempen unilateralmente los convenios roblaos colos Conceyos, col Ministeriu d'Educación y vulneren la LOE, “midíes qu'adelantren otru grave problema, la situación de más de 400 educadores que trabayen nestos centros y que s'atopen nuna situación d'indefinición xurídica y llaboral”.
 
UNA tamién sofita la manifestación 
 
Mientres, el voceru d’Unidá Nacionalista Asturiana, Faustino Zapico, tamién fixo un llamáu a la ciudadanía pa movilizase contra “esti nuevu ataque'l sistema públicu d'educación”.
 
Pa Zapico, el Gobiernu de Asturies “depués de espilfarrar el dineru público en sobrecostos, obres innecesaries, en Formúla 1 o'l fútbol vese obligáu a retayar nuevamente nos servicios públicos esenciales, nesti casu na educación infantil, amenorgando les places de dirección radicalmente y convirtiéndolos el trabayadores ambulantes que tienen qu'atender dellos centros”.
 
Dende UNA denuncien que’l cambéu de criteriu débese a la falta de fondos públicos pa encarar les necesidaes de la ciudadanía, pola actuación “irresponsable” de PSOE ya IX, “que-yos esmolez más el réditu electoral del gastu públicu que-yos dexe inaugurar obres o salir nos medios de comunicación, qu'atender afechiscamente los servicios públicu”.
 
La rectificación parcial realizada pol resolvimientu del 29 de xunetu nun ye “más qu'un meru parche que se vieron obligaos a realizar poles protestes xeneralizaes d'instituciones, profesionales y padres, pero qu'en nengún casu garantiza la calidá nes escueles infantiles” señaló Faustino Zapico.
 
Finalmente, Zapico quixo amosar el sofitu d’UNA a Suatea y llama a la participación de tola ciudadanía. Amás, soliciten que se vuelva a la situación inicial, que s'abandone la política de retayos y que se respete tantu al personal que trabaya en diches escueles como a les comunidaes educatives.