El Gobiernu aprueba'l nomamientu de Herminio Sastre como Conseyeru

El Conseyu de Gobiernu aprobó güei en sesión estraordinaria'l nomamientu de Herminio Sastre como nuevu Conseyeru d'Educación y Ciencia, que releva a J. L. Iglesias Riopedre.

El nuevu titular de la Conseyería d'Educación va tomar posesión del so cargu mañana vienres, día 6 d'agostu, a les 12:00 hores na sede de la Presidencia del Gobiernu del Principáu.
 
El cambéu de titularidá na Conseyería aprovechóse p'amenorgar la so estructura orgánica, que pasa de cuatro a tres Direcciones Xenerales. Amás, desanicióse la Viceconseyería de Ciencia y Tecnoloxía, qu'hasta agora encabezaba'l yá nuevu Conseyeru.  Les competencies en materia d'I+D+i pasen a depender directamente del nuevu titular de la Conseyería.
 
La fusión de los dos Direcciones Xenerales produzse n'aceptando tamién el Conseyu de Gobiernu la dimisión de María Jesús Otero por cuenta de la so xubilación, que taba’l mandu de la Dirección Xeneral de Planificación, Centros ya Infraestructures. Estes competencies van ser asumíes pol hasta agora Director Xeneral de Personal Docente, Alberto Muñoz González. Con estos cambeos, la so cartera pasa a llamase dende güei Dirección Xeneral de Planificación Educativa y Personal Docente.
 
El restu de la estructura orgánica queda intacta, esto ye, Juan José Sánchez Navarro al mandu de la Dirección Xeneral de Polítiques Educatives Ordenación Académica y Formación Profesional y Miriam Cueto Pérez, como Directora Xeneral d'Universidaes.
 
Currículu

Herminio Sastre Andrés ye natural de Villar del Yermo, Lleón (1952). Ye Doctor en Ciencies Químiques pola Universidá d'Uviéu con Premiu Estraordinariu de Llicenciatura y de Doctoráu y Catedráticu de Tecnoloxía del Mediu Ambiente de la Universidá d'Uviéu, onde impartió docencia n'Inxeniería Química ya Inxeniería Ambiental dende 1976.
 
Estancies d'estudios ya investigación na Universidá de Trondheim (Noruega, 1979), Universidá Tecnolóxica de Pardubice (Checoslovaquia, 1980) Universidá de Sherbrooke (Canadá, 1985) y l'Universidá de Pittsburgh (Estados Xuníos, 1986).
 
Realizó 28 proyectos d'investigación financiaos pel Centru d'Investigación Científica y Tecnolóxica (CICYT), el Plan Rexonal d'Investigación d'Asturies y pola Xunión Europea, y llevó a cabu otros proyectos con empreses ya instituciones como Química Farmacéutica BAYER, Industrial Química del Nalón, col Consorciu pa la Xestión de Borrafes Sólides d'Asturies (Coxersa), Aceralia, La Corporación Alimentaria Peñasanta S.A.(CAPSA), col Conceyu de Xixón, la Conseyería de Mediu Ambiente y Urbanismu o Rymoil-AGR.
 
Foi subdireutor del departamentu d'Inxeniería Química y Tecnoloxía del Mediu Ambiente de la Universidá d'Uviéu (1987-1991) y director del Institutu Universitariu de Tecnoloxía Industrial d'Asturies (IUTA) 1998-1999.
 
Herminio Xastre foi Conseyeru de Mediu Ambiente del Gobiernu d'Asturies mientres la V Llexislatura (1999-2003). Foi presidente de Coxersa, del Consorciu d'Agües d'Asturies (Cadasa), de la Xunta de Saneamientu d'Asturies y vocal de l'Autoridá Portuaria d'Avilés (2000-2003).
 
Desempeñó'l cargu de Viceconseyeru de Ciencia y Tecnoloxía del Gobiernu del Principáu; foi Presidente de la Fundación pal Fomentu n'Asturies de la Investigación Científica Aplicada y la Tecnoloxía (FICYT) y miembru del Conseyu Rector del IDEPA dende l'añu 2003, según coordinador y xestor del Plan de Ciencia, Tecnoloxía ya Innovación d'Asturies (PCTI) 2006-2009.
 
Ye miembru de los Patronatos de los Centros Tecnolóxicos pal Diseñu y la Producción Industrial d'Asturies(PRODINTEC); de la Fundación ITMA, que xestiona'l Centru Tecnolóxicu del Aceru y Materiales Metálicos y el Centru Tecnolóxicu de Materiales non Metálicos; de la Fundación CTIC (Centru Tecnolóxicu de la Información
y la Comunicación); del Centru Tecnolóxicu Forestal y de la Madera (CETEMAS); del Centru d'Investigación en Nanomateriales y Nanotecnoloxía (CINN); de la Fundación pal Progresu del Soft Computing; y del Serviciu Rexonal d'Investigación y Desenvolvimientu Agroalimentario (SERIDA). Amás, ye Conseyeru del Conseyu d'Alministración de l'Autoridá Portuaria de Xixón (2007).
 
Sastre Andrés ye miembru de la Comisión Nacional d'Evaluación de l'Actividá Investigadora (CNEAI) dende 2007 y miembru del grupu de trabayu del Conseyu Xeneral de la Ciencia y la Tecnoloxía (MICINN, 2003).