De Lorenzo diz que'l PP va tener un candidatu "d'unión y qu'ilusione"

L'alcalde d'Uviéu, Gabino de Lorenzo, dixo esti miércoles que'l PP "comprometióse" a facer un paréntesis n'agostu no relativo al nomamientu del candidatu a les próximes elecciones.

En declaraciones a los periodistes, tres la visita a una esposición, evitó facer comentarios sobre'l "silenciu" del ex ministru, Francisco Álvarez-Cascos, y confirmó que los órganos internos del partíu van nomar "sin problemes" en setiembre al candidatu. "Va ser ún d'unión y qu'ilusione a esta murnia rexón asturiana", defendió.
  
El primer edil llamentó qu'ún de los problemes del PSOE n'Uviéu y n'Asturies seya "el debate internu que pue haber nel PP pa nomar candidatu", y convidólos a que se pregunten "quién ye güei'l presidente del Partíu Socialista y del Gobiernu rexonal".
  
Nesti sen, refirióse a Álvarez Areces como un home "dimitíu" que "agacha la cabeza ante les ignominies que tenemos que tar sufriendo los asturianos".
  
Amás, criticó que la "gran preocupación" del que se perfila como candidatu pol PSOE, el presidente de la FSA, Javier Fernández, seya "un problema internu del Partíu Popular". "Pa escoyer candidatos en cualquier partíu hai un debate internu; eso pasa nes democracies consolidaes", dixo dempués d'aludir a los casos d'EE.UU y del propiu PSOE en Madrid.
  
De Lorenzo dixo, qu'a diferencia de lo qu'asocede n'Asturies, "onde vamos d'escursión pel mediu mundu a pol votu del emigrante", "el de les anchoes" -el presidente cántabru-, Miguel Ángel Revilla, llogró en Madrid "promeses, compromisos y obres".