El Principáu va destinar 589.000 euros pa restaurar Les Pelayes

El Conseyu de Gobiernu autoriza un gastu de 589.970 euros pa restaurar les cubiertes del Monesteriu de San Pelayu d'Uviéu, onde va agospiase dientro poco l’Academia.

Los trabayos van cuntar con una aportación de 358.344 euros del Ministeriu de Fomentu con cargu a los proyectos del 1 por cientu cultural. El restu del financiamientu, más de 230.000 euros, va correr al cargu de la Conseyería de Cultura y Turismu.
 
Les obres que se definen nel proyectu consisten na renovación de les cubiertes, el
refuerzu de la estructura antigua de madera y el saneamientu del teyáu, “lo que constitúi una obra fundamental pal caltenimientu d'esti monesteriu”, indiquen dende’l Principáu.

Los trabayos inclúin la construcción d'un forxáu transitable como techu de toles dependencies de la planta segunda, como primer fase de les obres; el diseñu de la nueva cubierta del cuerpu ente'l patiu interior y la cai del Águila; el caltenimientu de la xeometría de la cubierta a dos enagües nel cuerpu asitiáu ente la cai Xovellanos y el patiu interior; el diseñu de los alcuentros de los faldones de la nueva cubierta colos de la esistente, de manera tradicional; y les obres de caltenimientu necesaries pa reparar los bistechos actuales.