Dimite por motivos de salú José Luis Iglesias Riopedre

El conseyeru d'Educación y Ciencia, José Luis Iglesias Riopedre presentó la so dimisión, decisión qu'aprobó güei'l Conseyu de Gobiernu del Principáu.

El cese débese a los encamientos médicos que-y contraindiquen cualquier actividá que xenere estrés, pues "supondría un grave riesgu pal so salú". Va sustituyilu l'hasta agora viceconseyeru de Ciencia y Tecnoloxía, Hermino Sastre. Un nomamientu que'l mesmu dimisionariu calificó de "continuista".
  
Asina lo anunció güei'l mesmu Riopedre, al acabar la rueda prensa de la conseyera d'Alministraciones Públiques, Ana Rosa Migoya, pa informar de los acuerdos del Conseyu de Gobiernu.
  
N'anunciando la tamién vocera del Gobiernu'l cese del conseyeru d'Educación, Riopedre lleó un comunicáu nel qu'informaba: "tres la valoración médica pertinente, tengo que cesar darréu en cualquier actividá que xenere estrés, porque supondría un grave riesgu pa la mio salú".
  
Calificó de "dolorosa" la decisión de "nun acabar la llexislatura", pero "véome obligáu a presentar la mio dimisión con carácter inmediatu por motivos de salú", esplicó.
  
Asina, el conseyeru esplicó que tres la so dimisión, la Conseyería adopta una nueva estructura "continuista", na qu'amás del nomamientu de Herminio Sastre, fúndense dos direcciones xenerales, les de Personal y Planificación, que van pasar a ser una sola de Personal y Planificación al cargu d'Alberto Muñoz, anterior director de Personal. L'hasta güei directora de Planificación, María Jesús Otero, tamién presentó'l so cese por decisión propia.
 
DESARROLLU EDUCATIVU N'ASTURIES
  
Nel so comunicáu, el conseyeru considera que "la etapa del actual presidente, Vicente Álvarez Areces, supunxo un gran impulsu de crecimientu y desarrollu p'Asturies". "La educación asturiana baxo la so presidencia algamó cotes de calidá y recursos difícilmente superables", añadió.
  
Al so xuiciu, la educación supón "más conocencia, más igualdá, más ciudadanía, más posibilidaes d'inserción llaboral y social". "Creo qu'esti oxetivu cumplímoslu non yá dende l'añu 1999, sinón dende 1983, dende la Dirección Provincial d'Educación d'Asturies: ehí empezó la llarga marcha hacia la reforma y meyora de la educación asturiana, y na so andadura tuve l'enorme privilexu de participar xunto col presidente del Principáu", afirmó.
  
Acabó agradeciendo a "tola comunidá educativa asturiana'l so trabayu y esfuerzu por llograr un sistema educativu d'escelencia".
  
A lo último, "a tolos equipos que collaboraron conmigo na Conseyería a lo llargo d'estos años, tengo qu'agradecé-yos la so intelixencia, el so tesón y el so compromisu; sin ellos nada de lo que ficimos diba ser posible", acabó'l Conseyeru.
 
RECONOCENCIA DE MIGOYA
  
Antes de da-y un abrazu de despidida, la vocera del Gobiernu definiólu como "una persona que realizó un trabayu bien intensu a lo llargo de tola so vida pola calidá del serviciu públicu y del sistema educativu". "Debémos-ylo a él en gran midida", señaló refiriéndose a la situación de la educación n'Asturies.