Ana Cano: “Prestaríame que Riopedre siguiera hasta’l final”

Ana Cano diz llamentar fondamente la dimisión de Riopedre, yá que con él hubo pasos alantre col asturianu, “personalmente hubíereme prestáu que siguiera tola llexislatura”.

La presidenta de l’Academia de la Llingua fixo estes declaraciones en Cangas, nel marcu de la Universidá Asturiana de Branu, tres conocese que’l conseyeru d'Educación y Ciencia, José Luis Iglesias Riopedre, dimitiera por motivos de salú, asociaos al estrés del cargu.

“Riopedre tuvo en Cangas el pasáu llunes, na inauguración de la Universidá Asturtiana de Branu (UABRA) y siempre sofitó’l trabayu de l’Academia de la Llingua y el propiu nacimientu de la UABRA”, solliñó Ana Cano.

La Presidenta de l’ALLA reconoció que se pudo avanzar muncho más na cuestión llingüística a lo llargo de les sos dos llexislatures como Conceyeru d’Educación, como ye na reconocencia de la especialidá d’asturianu en Primaria y Secundaria, “pero hubo pasos alantre, tengo nidiu qu’a él nun y dexaron facer tolo que quixo”.

Sobre que l’últimu discursu del yá ex Conseyeru fora n’asturianu, nel marcu de la inauguración de la UABRA, Cano dixo que nun yera la primer vegada que Riopedre facía un discursu n’asturianu. “Ye mui significativu que’l so últimu discursu fora un compromisu real cola llingua del país, de xuru qu’él escoyólo asina como una amuesa más del so compromisu col idioma”, señaló.

Sobre’l futuru del asturianu, Ana Cano afirmó que’l próximu Presidente del Principáu tendrá que tener en cuenta la cuestión llingüística, “nun se pue siguir marxinando al profesoráu d’asturianu y a los propios falantes, poner fin a esa discriminación namás pasa pol reconocimientu de la oficialidá”.