El númberu de paraos baxa un 4,49% nel mes de xunetu

El númberu de paraos baxó en 3.369 persones en xunetu, una cayida del 4,49% sobre'l mes anterior, colo que'l númberu total de paraos n'Asturies queda nos 71.675 persones.

Na comparanza interañal, n'Asturies, el Paru rexistró n'Agostu una subida del 6,56%, lo que supón 4.414 paraos más nel país sobre'l mesmu periodu del añu pasáu.

El númberu d'homes que nun atopen trabayu nel país (33.414) ye inferior al de les muyeres (38.261). Amás, nel mes de xunetu, los paraos menores de 25 años superaron los 7.000 (7.209), de los que 4.097 yeren homes frente a les 3.112 muyeres.
  
Nesta ocasión, tolos sectores esperimenten nel mes de xunetu un descensu nel númberu de paraos sobre'l mes anterior. La cayida más fuerte rexístrase nel sector servicios, onde se pierden 2.329 paraos, polo que sumen un total de 45.602, el sector con mayor númberu de paraos de nuevu.
    
Sígenlu la construcción (-535 paraos), con 11.419 paraos; el sector de la industria (-394), con 7.875 paraos; el grupu de persones ensin empléu anterior (-75), con 5.940 paraos; y el sector de l'agricultura (-36), qu'axunta 839 persones ensin trabayu n'Asturies.
  
El númberu de paraos estranxeros rexistraos n'Asturies nel mes de xunetu foi de 5.039, de los que 2.554 pertenecíen al sector Servicios, 1.233 a la Construcción, 335 a la Industria, 747 nun teníen empléu anterior, y 170 incluyíense nel sector de l'Agricultura.
  
No referente a la contratación, a lo llargo del mes de xunetu firmáronse un total de 28.717 contratos, de los que 1.871 yeren indefiníos y 26.846 yeren temporales. Esti númberu de contratos supón una subida del 14,79 sobre'l mes anterior, cuando se firmaron 3.700 contratos menos.