Trevín diz que la única obra pública paralizada ye Salas-La Espina

El delegáu de Gobiernu, Antonio Trevín, afirmó que la única obra paralizada n'Asturies pol Ministeriu de Fomentu ye la del tramu Salas-La Espina, por rescisión de contratu.

Negó asina que se paralizaren otros trabayos na Autovía del Cantábricu. Preguntáu polos periodistes sobre esti tema, al términu d'una rueda prensa sobre les ayudes al mediu rural tres les inundaciones, el delegáu esplicó que "tamos paraos namás tenemos ún, que ye'l del Salas-La Espina". Esplicó qu'hubo una rescisión de contratu y "va haber que sacar una nueva licitación", polo que nun pudo dar el plazu de reentamu de los trabayos, como se-y preguntare.   
 
Con respecto al restu d'obres, matizó qu'hubo una ralentización en delles partes de l'Autovía del Cantábricu, pero non una paralización. "Tolos ministerios tienen que reducir el so presupuestu, y nes obres en marcha a les qu'esti añu se baxó la cantidá que teníen axudicada, si acabaron el so presupuestu quéden mui ralentizaes", matizó.