El Bloque diz que’l paru amuesa la incapacidá del Principáu

El Bloque por Asturies considera que, el descensu del paru en 3 369 persones en xunetu, constata'l “fracasu ya incapacidá” del Gobiernu pa crear empléu estable y de calidá.

“Nin siquier la coyuntura estacional del branu con contrataciones temporales y precaries nel sector servicios, consigue tapar y esconder una realidá murnia, negativa y esmolecedora”, señalen.  

La organización afirma que los datos van vese agravaos cola aplicación de la Reforma Llaboral aprobada nel Congresu español y cola aplicación de la Llei d'Axuste aprobada nel Parllamentu asturianu.

“A esto sumanse los retayos anunciaos por distintos Ministerios en vivienda, infraestructures y obres públiques, que van tener graves consecuencies sobre la creación d'empléu. Tou esto fainos ser pesimistes sobre'l futuru del mercáu llaboral n’Asturies, porque les midíes de los Gobiernos d'España y d’Asturies nun avancen na dirección de crear empléu, nin muncho menos”, apunten.

Pal Bloque por Asturies lo único que queda claro ye que'l paru, nun añu, aumentó n’Asturies un 6´56 %, “lo que significa 4 414 persones más desemplegaes, golpiando nuevamente de forma más grave a muyeres y xóvenes”.

La organización considera como datu especialmente esmolecedor y bien grave que 'l 6´52 % de los contratos roblaos nel mes de xunetu fueren indefiníos, “lo que confirma la medría de la contratación inestable y precario”.