Andecha entruga nel Congresu, al traviés d'ERC, por qué l'Estáu "mintió" al Conseyu d'Europa sobre l'asturianu

Andecha Astur presentó esta selmana al Gobiernu nel Congresu de los Diputaos, al traviés d'Esquerra Republicana de Cataluña, partíu col qu'integra la coalición Europa de los Pueblos, una entruga na que pide al Gobiernu español que "dea les esplicaciones oportunes sobre les mentires treslladaes al Conseyu d'Europa no que cinca a la situación actual de la llingua asturiana".
 
La formación nacionalista referíase asina al informe sobre les llingües minoritaries, fechu públicu hai unes selmanes. Esplicaba que'l documentu atribuyía la falta d'oficialidá "a la falta de normalización de la llingua y d'una lliteratura escrita afayadiza, lo qu'amuesa la mala intención pela parte de les autoridades competentes y que contrasta colo que se diz dende l'organismu européu". Según recuerda Andecha, el Conseyu, nuna visita nel territoriu informó al Comité d'Espertos que "l'Academia de la Llingua Asturiana tenía acabada la versión normalizada de la llingua (diccionariu, gramática, nomenclatura de los topónimos) y tamién de qu'hai consensu social sobro l'emplegu de la llingua (el 60% de la población ta a favor de la cooficialiá)".
 
Andecha Astur pidió tamién al Gobiernu español que cumpla cola Carta Europea de les Llingües Rexonales o Minoritaries, "que tien roblada, y colos encamientos del organismu européu, presionando nesti casu al Gobiernu d'Asturies pa que declare la oficialidá de la llingua asturiana".