Ban Ki Moon anuncia una comisión sobre la 'Flota de la Llibertá'

El secretariu xeneral de la ONX, Ban Ki Moon, anunció formalmente la creación d'una comisión internacional pa investigar l'abordaxe de la Flota de la Llibertá.

"Nos dos últimos meses caltuve intensos contactos colos líderes d'Israel y Turquía pa la creación d'una Comisión d'Investigación del incidente de la flotilla del 31 de mayu", esplica Ban nuna nota de prensa. "Güei tengo'l prestu d'anunciar el llanzamientu de la Comisión. Este ye un acontecimientu sin precedentes", afirmó.

Esta ye la primer vez que l'Estáu d'Israel acepta participar nuna investigación de la ONX nun casu rellacionáu cola actuación del so Exércitu. Tamién ye la primer vez qu'Israel va tar directamente representáu nuna comisión de Naciones Xuníes rellacionada con actividaes israelines.
  
"Quiero mostrar el mio agradecimientu a los líderes de dambos países con el que caltuvi contactos d'última hora mientres la fin de selmana por el so espíritu de compromisu y visión de cooperación", añedió Ban Ki Moon.
  
La Comisión d'Investigación va tar presidida pol ex primer ministru de Nueva Zelanda Geoffrey Palmer y la vicepresidencia va ser pal presidente saliente de Colombia, Álvaro Uribe. Amás va incluyir a un representante del Gobiernu turcu y a otru del israelín. El comunicáu caltién que la comisión va empezar a trabayar el próximu 10 d'agostu y que va remitir un primer informe d'actividá pa mediaos de setiembre.
  
"Espero que la Comisión satisfaiga'l so mandatu basáu na Declaración de la Presidencia del Conseyu de Seguridá de la ONX cola total collaboración de les autoridaes relevantes de los dos países", afirma Ban. "Tamién me dará encamientos pa evitar incidentes semeyantes nel futuru", especifica.
  
"Tamién espero que l'acuerdu de güei tenga un impactu positivu na relación ente Turquía y Israel, asina como na situación global n'Oriente Próximu", acaba'l comunicáu de Ban Ki Moon.