Riopedre: “El Principáu yá desendolcó’l curriculu d’asturianu”

Riopedre afirmó que yá se completó'l desendolcu curricular de l’asturianu en toles etapes y calificó a la UABRA como "exemplu pa esparder la cultura asturiana".

El Conseyeru d'Educación y Ciencia, José Luis Iglesias Riopedre, inauguró güei la Universidá Asturiana de Branu (UABRA), una nueva iniciativa que ponen en marcha conxuntamente la Universidá d'Uviéu y l'Academia de la Llingua, y que cunta cola collaboración de la Conseyería d'Educación y Ciencia.  La Universidá Asturiana de Branu va tener la so sede permanente en Cangas.

Al actu asistieron tamién el Vicerrector d'Informática y Comunicaciones, Víctor Guillermo García García; la Presidenta de l'Academia de la Llingua, Ana Cano; el Director de los cursos, Xosé  Antón González Riaño; y l'Alcalde de Cangas, José Manuel Martínez

Mientres la inauguración, Riopedre, que fixo’l so discursu dafechu n’asturianu, definió la Universidá Asturiana de Branu como "una nueva aventura formativa y pedagóxica" qu'aúna a les instituciones qu'históricamente vienen encargándose de la formación del profesoráu.

El Conseyeru añadió que'l Principáu d'Asturies yá completó'l desendolcu curricular de la llingua asturiana en toles etapes educatives y felicitó a les instituciones encargaes de la organización de la UABRA porque "son un exemplu de collaboración pa esparder la cultura asturiana".

"Per una parte a l'Academia de la Llingua que sigue la trayectoria de los cursos de branu d'asturianu que yá algamen la so XXVIII edición, y per otra parte a la Universidá d'Uviéu qu'al traviés de los cursos d'estensión universitaria sigue la tradición d'averar la formación universitaria a tola sociedá. Agora nesta ocasión braniza faila nel campu de la formación n'asturianu", concluyó'l Conseyeru.
 
Mientres, la presidenta de l'Academia de la Llingua Asturiana, Ana Cano, punxo la UABRA como exemplu de que la oficialidá ye posible. "La oficialidá ye la meta que tenemos, ensin ella nun hai futuru pa la UABRA y pa los falantes d'asturianu", solliñó.
 
Cursos y actividaes

L'actu oficial d'inauguración tuvo llugar nel Institutu d'Enseñanza Secundaria (IES) de Cangas, qu'acueye la UABRA en réxime d'internáu y cuenta con un ampliu y rigorosu programa empobináu a los estudiantes de les distintes carreres universitaries, que van poder algamar ente 4,5 y 6 creitos de llibre configuración.

Estos cursos tamién tienen reconocencia oficial de la Conseyería d'Educación como actividá de Formación Permanente del Profesoráu pa los  docentes de Primaria y Secundaria. En total participen unes 150 persones.

Los cursos, destinaos a la formación y especialización  en materia de llingua asturiana y al conocimientu de la realidá social de la nuesa tierra,  pondránse en Cangas ente güei y el día 13 d’agostu y la parte formativa va dir acompañada d’una bona riestra d’actividaes culturales abiertes a tola sociedá canguesa.
 
Güei, empiciando cola inauguración d’estas actividades, presentóse na Casa la Cultura de Cangas del Narcea Palaciu d’Oumaña la exposición d’Adolfo Manzano, Pequeñes nubes nel cielu, nel xardín xuxurios, qu’en palabras del artista pretende reflexar al xardín como espaciu onde confluyen lo público y lo privao a traviés de las distintas formas de materialización de la vida ya la muerte.