El PP critica la estratexa del PSOE de "ocupar l'Alministración con amigos"

El PP considera que'l Gobiernu autonómicu socialista ta desarrollando una estratexa pa "ocupar l'Alministración con amigos" en dellos puestos de responsabilidá.

Asina lo entiende, tres les recientes sentencies qu'anularon cerca de 1.000 nomamientos d'altos cargos funcionariales por supuestes irregularidaes nos procesos selectivos, y que, según el PP, beneficiaben a los "nomaos a deu".
  
Asina lo señalaron los diputaos autonómicos Ana Barrientos y Ramón García Cañal, nuna rueda prensa convocada p'analizar la situación creada poles cuatro sentencies conocíes recientemente, y que dan la razón a los sindicatos frente a l'Alministración. La formación solicitó la comparecencia de la conseyera d'Alministraciones Públiques, Ana Rosa Migoya, y del director xeneral de Función Pública, Daniel Álvarez, por esti asuntu.
  
"Nada pasa por casualidá, hai una política planiada d'ocupación política de l'Alministración del Principáu", denunció públicamente Cañal, apoyáu pola so compañera.
  
Asina, según el diputáu, siguióse una determinada estratexa dende l'añu 1999. "Dende entós empiecen a nomase en comisión de servicios, esto ye, a deu, los puestos de les xefatures de sección y de negociáu, que son absolutamente profesionales y non de llibre designación", esplicó.
  
Nel 2007, siguió, "convóquense los concursos, pero recúrrenlos los sindicatos y anúlenlos, porque nos varemos de puntuación, a los nomaos a deu puntuábense-yos tolos años en comisión de servicios, colo que los demás concurrentes taben n'inferioridá de condiciones, porque se puntuaben los años nel puestu".
  
Asina, Cañal recuerda qu'entós el Tribunal estableció que namás se valoraría a lo más un añu d'esperiencia. "El Gobiernu lo que fai ye dicir que se puntúa namás un añu, polo que'l restu de funcionarios que puen llevar 20 años de servicios vense n'igualdá de condiciones colos nomaos a deu", matiza, señalando'l motivu principal pol que los tribunales volvieron fallar contra los nomamientos recientemente.
  
"L'oxetivu del Gobiernu yera dexar amarrada y bien garrada l'alministración colos sos profesionales antes de les elecciones del 2011; dexar asitiaos a los sos averaos, pa que cuando llegare'l nuevu gobiernu nel 2011 atopárase una Alministración ocupada polos amigos", señaló.
  
Asina, p'Ana Barrientos, "la práctica totalidá de xefatures y altos funcionarios correspondientes a l'Alministración del Principáu d'Asturies ta baxo sospecha d'irregularidá no referente a la tramitación de les bases". "Nun puede cometese un error cuando los tribunales dicen que nun se pue dir alantre con determinaes bases, y años dempués alcuéntreste con una sentencia qu'espresamente diz que paez que trates d'evitar los efectos d'una sentencia anterior", protestó la diputada.
  
Amás calcó en que na sentencia dizse que "el representante de l'Alministración nun ofreció razón alguna de singular fecha y actuación". "Da la impresión de que quería dexase asitiaes a determinaes persones ante un posible cambiu de gobiernu", acabó la parlamentaria.