Los sindicatos refuguen les restricciones nel carbón

Los sindicatos FIA-UXT y la Federación d'Industria de CC.OO refugaron la propuesta de reglamentu del Conseyu sobre les ayudes estatales al carbón.

 Coles mesmes, decidieron consensuar col restu de partes implicaes un acuerdu pa "la continuación del sector estratéxicu de la minería enerxética del carbón n'España".
  
Les organizaciones sindicales reuniéronse esti xueves por pidimientu propiu col ministru d'Industria, Turismu y Comerciu, Miguel Sebastián, el secretariu d'Estáu d'Enerxía y el director xeneral de Política Enerxética.
  
Ante los representantes ministeriales, ambes organizaciones reafirmaron el so compromisu de cumplir l'actual Plan nacional de reserva estratéxica de carbón 2006-2012 y el nuevu modelu de desarrollu integral y sostenible de les comarques mineres, "en toles los sos variables" y recordándo-yos que "tanto'l Gobiernu como'l Ministeriu tienen que cumplir la parte que-yos correspuende".
  
Coles mesmes, refugaron l'aprobación per parte de Bruxeles del Real Decretu de restricciones por garantía de suministru, que "pue suponer l'entamu d'un nuevu impagu de nómines, según la propuesta en materies d'ayudes estatales con oxetu de zarrar les mines de carbón que nun seyan competitives".
  
Al respecto, precisen qu'a partir del próximu 1 de xineru "les mines españoles nun tendríen nenguna ayuda, nun siendo les qu'entraren o s'incorporaren a un procesu de zarru", lo que se traduz na desapaición de la minería enerxética del carbón.
  
"Les organizaciones sindicales mostramos la nuesa indignación y refugu más absolutu pol conteníu y la decisión de la xunta celebrada pol Colexu de Comisarios el pasáu día 20 y la nuesa decisión foi que tenemos de consensuar col restu de les partes implicaes, incluyíu'l Gobiernu, una respuesta a esta situación anómala que permita un acuerdu pa la continuación del sector", apunten.
  
Pa ello, piden que quede claro "el compromisu del Executivu de caltener el volume de recursos disponibles pa la reactivación económica de les comarques mineres".
  
A lo último, pidieron que "dientro de la propuesta que se ta negociando sobre política enerxética, y más en concreto dientro del MIX enerxéticu, s'incluya la relevancia que pa España y la UE tien como fonte d'enerxía autóctona, estratéxica, por seguridá de suministru y por cuestiones sociales y territoriales, el sector estratéxicu de la minería enerxética del carbón".