El Bloque diz que la Reforma llaboral convirtió'l despidu en llibre y gratuitu

El Bloque por Asturies considera que’l descensu del paru, ye un espeyismu que va sumir antes de rematar l'añu cola aplicación de la Reforma Llaboral y la Llei d'Axuste.

Pal Bloque por Asturies, lo único que queda claro colos datos oficiales de la Encuesta de Población Activa ye que'l paru, nun añu, aumentó en Asturies más d'un 15%, asitiándose casi en 80.000 persones oficialmente, lo que representa un 16´38%, afeutando de forma más grave a muyeres y nueves.

A estos datos añaden el descensu de la población activa y que la tasa d'actividá n’Asturies ye casi un 10% inferior a la media del Estáu español. Amás, a esto suman los retayos anunciaos por distintos Ministerios en vivienda, infraestructures y obres públiques, “que van tener graves consecuencies sobre la creación d'empléu”.

“Too esto fainos ser pesimistes sobre'l futuru del mercáu llaboral, yá que les midíes de los Gobiernos d'España y d’Asturies nun avancen na dirección de crear empléu”, señalen.

El Bloque por Asturies considera que la Reforma Llaboral aprobada pol Congresu español, “siguiendo un procedimientu defacehu vergonzosu y de llombu a la sociedá como decreto llei pela vía d'urxencia”, perxudica gravemente esta situación y convierte’l despidu en llibre y gratuitu.

“El PSOE acábase de convertir definitivamente nel Partíu Socialista de los Empresarios, soterrando'l so “O” d'obreru, aceptando la imposición de les recetes neolliberales del FMI, el ECOFIN y los mercaos financieros, y dando el llombu a trabayadores y trabayadores”, solliñen.

El Bloque por Asturies llama a responder, “non dende la resignación, sinón dende la movilización y la defensa de los derechos”, y considera que la fuelga xeneral del próximu 29 de setiembre va ser una contestación democrática, masiva y contundente, “y un primer pasu pa demostrar que nun nos van a robar el futuru”.