La ONX declara derechu esencial l'accesu a agua y sanidá

L'Asamblea Xeneral de Naciones Xuníes declaró que l'agua potable y llimpia y la sanidá ye un Derechu Humanu esencial pal plenu disfrute de la vida y de los Derechos Humanos.

Amás, manifestó la so fonda preocupación porque casi 900 millones de persones en tol mundu nun tienen accesu a agua llimpia.
  
Los 192 miembros de l'Asamblea pidieron a los estaos miembros de la ONX y a les organizaciones internacionales qu'ofrecen financiación, tecnoloxía y otros recursos p'ayudar a los países más probes a aumentar los sos esfuerzos pa dar agua potable, llimpia y accesible y sanidá pa tol mundu.
  
La resolución de l'Asamblea recibió 122 votos a favor y cero votos en contra, mientres que 41 países astuviéronse de votar. El testu de la resolución tamién manifiesta la so fonda preocupación porque polo menos 884 millones de persones nun tienen accesu a una agua potable segura y más de 2.600 millones de persones nun tienen accesu a cuidaos sanitarios básicos. Los estudios tamién indiquen que polo menos 1,5 millones de neños menores de cinco año muerren cada añu por enfermedaes rellacionaes col agua o cola sanidá.
  
La resolución tamién contempla'l pidimientu del Conseyu de Derechos Humanos por que la esperta independiente nes obligaciones relacionaes col accesu al agua potable segura y la sanidá, Catarina de Albuquerque, informe añalmente a l'Asamblea Xeneral.
  
Los informes de De Albuquerque van centrase nos desafíos principales p'algamar el derechu a agua potable segura y llimpia y a la sanidá, asina como sobre'l progresu pa llograr los Oxetivos de Desarrollu del Mileniu (ODM).