El 'Coleutivu pola Xuntanza' constituyese como asociación

El ‘Coleutivu pola Xuntanza’ vien de constituyise formalmente como asociación p’afalar que nes eleiciones de 2011, una candidatura conxunta del nacionalismu seya una realidá.

Según indiquen, el coleutivu lleva dellos meses aconceyando con regularidá col envís d’analizar la situación del movimientu políticu nacionalista/asturianista nes sos estreames sensibilidaes. Sicasí, ye agora cuando la iniciativa entama agora un procesu de regulación formal pente medies de la creación d’una asociación.

La iniciativa ñació va más d’un añu al traviés d’internet, onde se foi conformando esti grupu de ciudadanos esmolecíos pola escasa presencia del nacionalismu asturianu nes instituciones, que ye frutu, al so xuiciu, “de la dixebra de les fuercies d’esti calter, espardíes anguaño nuna riestra de siegles”, que consideren “tienen más coses en común que diferencies”.

El coleutivu va celebrar un conceyu, el próximu 31 de xunetu, en Xixón, onde van decidir les persones que van ocupar los cargos del mesmu, y onde se van aprobar los sos estatutos internos.

La idea del ‘Coleutivu pola Xuntaza’ ye afalar la creación d’una candidatura conxunta de les fuercies polítiques del espectru actual, evitando les inxerencies de fuercies como Izquierda Xunida, qu’a xuiciu del Coleutivu “vieno xugando coles ilusiones de los nacionalistes asturianos y perxudicando la evolución de los resultaos electorales de les formaciones realmente nacionalistes”.

L’oxetivu final ye consiguir lo que, dicen, “pue demostrase colos datos electorales de 2007”, aumentar al traviés de la xuntanza que piden, el númberu de conceyales nacionalistes y la presencia na más alta institución asturiana, la Xunta Xeneral.

El Coleutivu ta abiertu a toles persones interesaes en collaborar nesti oxetivu y nes selmanes vinientes van entamar una rolda de conversaciones colos dirixente de les fuercies nacionalistes asturianes,  “pa esplica-yos los sos oxetivos y afalar un verdaderu alderique sobre la xuntanza, que lleve a un pautu responsable ente les formaciones”.
 
Carlos X. Blanco; “Valledor comprometióse más cola llingua que’l propiu Bloque”